Diamars ultimo partido AVP firma un contract di huur cu gerencia di edificio di MFA na Noord, pa asina tene su di dos reunion informativo relaciona cu e cantidad di medidanan cu gabinete Wever Croes a impone riba pueblo, pa asina pueblo haya informacion corecto riba efecto cu e medidanan aki ta bay tin riba tur hende y den tur cas di famia.
Lider di partido AVP ayera tardi na Cas di Partido AVP a mustra cu pa sorpresa grandi, director encarga cu MFA Noord a informa partido AVP cu mester kibra e contract y cu AVP no por haci uzo di e facilidad aki, riba orden cu a bin for di gobierno.
Un acto cu Mike Eman a considera un abuso di poder y un forma di trapa libertad di expresion un desaroyo cu pa algun tempo caba ta tumando luga cu e gobierno di MEP-POR-RED.
Sr Eman a sigui mustra cu ya caba gobierno di coalicion a bin ta trata di kita derecho liber di expresion den varios caso, entre otro di medidanan tuma hasta contra miembronan di prensa pero tambe di ciudadanonan cu ta vocifera nan disgusto pa e forma con e gobierno aki a bin ta hibando su maneho, totalmente contrario na loke nan a priminti pueblo cu na lo haci.
Prome Minister Wever Croes a drenta casnan di famia rond Aruba y sigura pueblo cu su gobierno lo atende cu e situacion financiero sin cu mester tuma medida pero e prome gran proyecto di su gobierno, a bira un proyecto di abuso contra pueblo, dor di impone un aumento di BBO y BAZV, cu lo bay ranca placa for di cartera di tur ciudadano riba e isla aki, simplemente pa e hecho cu e gobierno no tin e capacidad di goberna e pais sin castiga pueblo.
AVP a paga e huur di e edificio di MFA na Noord diamars ultimo y a haya aprobacion pa tene e reunion aki den e edificio aki, cu ta un di e proyectonan importante di gabinete Mike Eman, destina pa duna miho servicio na comunidad den diferente bario rond Aruba.
Motibo di cancela e contract manera a wordo anuncia na AVP lo ta pa e hecho cu nan ta considera cu e reunion di informacion aki ta un actividad politico pero aki lider di AVP a mustra cu varios actividad politico a yega di tuma luga caba den edificionan di MFA, incluso un anochi di celebracion di aniversario di partido RED cu ta forma parti di e gobierno actual.
Mike Eman a sigura cu su partido ta bay Corte den un kortgeding pa pidi Hues atende cu e abuso di poder aki, caminda tin tur indicacion cu esaki a bin for di Prome Minister Wever Croes, kende ta encarga cu e ministerio di asuntonan general.
E decision aki a wordo tuma den un reunion urgente ayera tardi na Cas di Partido caminda a ser mustra cu gobierno lo no por stroba libertad di expresion y no por evita cu pueblo ta haya informacion corecto riba e consecuencianan di e paketa di medida cu gabinete Wever Croes a prepara pa pueblo.
