Ayera mainta lider di fraccion di AVP den Parlamento, sr Marlon Sneek, a dirigi un carta na Presidente di Parlamento, den cual ta haci varios pregunta relaciona cu e situacion cu tin na Excelsior Casino y a pidi pa dirigi e preguntanan aki na Minister di Husticia, Andin Bikker pa e duna contesta na esakinan.
Den e carta sr Sneek na nomber di fraccion di AVP ta mustra riba e hecho cu doño di Excelsior Casino a bandona Aruba sin cu te dia di awe un otro manehado di e casino a bira conoci.
E hecho aki ta pone cu tin un grupo di 60 trahado di e casino, cu no tin idea riba kico ta bay pasa cu nan ya cu ainda e casino ta cera y no tin manehado nobo.
Un total di 9 pregunta fraccion di AVP ta haci na Minister di Husticia, entre otro puntrando e mandatario si su persona ta na altura cu doño di e casino a bandona Aruba.
Tambe si Minister Bikker lo a pidi aclaracion na doño di e hotel den cual e casino a ubica, si nan ta na altura cu manehado di e casino a bandona nos isla.
Otro pregunta na Minister Bikker ta si e por splica cuanto tempo e casino aki lo keda cera y kico ta intencion di Minister pa cu e grupo di 60 trahado cu na e momentonan aki ta na cas sin un entrada salarial.
Na mes momento a puntra e titular di husticia kico ta su intencion mirando e desaroyonan aki, si e lo bay over na ‘trek in’ e permiso di e casino aki ya cu e no ta den operacion y si esaki ta Minister sin intencion pa splica for di ki fecha e lo haci esaki.
Si dado caso e intencion di Minister no ta tuma e paso aki, fraccion di AVP ta puntra di con sr Bikker no a haci esaki ainda.
Un pregunta clave sigur pa e trahadonan cu ta na cas sin trabou ta si Minister Bikker por bisa si tin otro manehadonan a presenta nan mes pa tuma e casino over y si esaki ta e caso pa informa riba un of otro manehado nobo cu kier tuma e casino over.
Lider di fraccion di AVP, Marlon Sneek ta spera cu pronto lo haya claridad riba e desaroyo aki sigur mirando e hecho cu e manehado actual di Excelsior Casina a bandona Aruba sin regla su asuntonan cu e trahadonan cu no sa kico ta nan futuro.
E carta aki a wordo entrega diahuebs mainta 24 di september na Presidente di Parlamento y ta spera di lo haya contesta pronto di Minister di Husticia.
