Riba un pregunta di prensa e lider di AVP, mr. Mike Eman, tabata hopi enfatico y categorico: un gabinete di AVP lo aumenta pensioen di nos grandinan cu por lo menos 50%. Eman a enfatisa cu esaki no ta cuestion di un gesto, pero cu ta un ‘must’. E ta substancia esaki cu e cifranan cu ta mustra cu e pensioen actual ta keda leuw for di suficiente pa por alacansa e minimo cu un pensionado soltero of pareha mester pa sobrebibi.  

Durante un entrevista e siman aki, lider di AVP mr. Mike Eman a pasa brevemente door di historia pa mustra con AVP semper a sali na defensa di e derechonan y bienestar di pensionadonan na Aruba. E situacion penoso cu mayoria di pensiondo tin cu biba aden awor aki ta un inhusticia y un berguensa pa nos pais. Pesey AVP lo actua cu e mesun sentido di responsabilidad pa nos hendenan y cu e mesun boluntad pa bin cu solucionnan concreto pa pais y pueblo y cambia e situacion inacceptabel aki cu miles di pensionado ta forsa pa biba aden.

REDOBLACION DI PENSIOEN

Mr. Mike Eman a conta con e situacion di pensionadonan tabata ora su ruman major Henny Eman a bira prome minister di Aruba na 1994. Henny a laga haci e prome estudio tocante “bestaansminimum” o sea e suma di entrada cu hende tin mester di dje minimalmente pa por biba aki na Aruba. Danki na e investigacion ey Henny Eman por a demostra cu e pensioen di nos grandi no tabata alcansa pa nan biba di dje y cu mester a – por lo menos – redobla e suma di pensioen di behez. Y ela redobla e pensioen di nos grandinan!

Mike Eman a sigui splica cu un adulto mayor, mescos cu un mucha, ta entre esnan mas vulnerabel ora nan no tin suficiente placa pa biba un bida digno. Nan no por traha y ta dependiente di otronan. Si nan no tin un sosten di un famia, nan ta pasa den sufrimento y miseria. Segun Eman, esey ta loke e ta wak y tende unda cu e bay rond di Aruba. Loke ta haci e situacion aki pio ta cu cada bez tin mas hende ta bisa di ta den e situcion di falta chronico di hopi placa pa cubri nan gastonan basico y cu gobierno di Aruba pa hopi aña caba no ta haci net net nada pa cambia e situacion aki den cua ya miles di hende y famia ta aden.

AUMENTO SUBSTANCIAL 

TA UN MUST ATROBE

“P’esey loke nos ta bisa no ta un promesa politico. E ta un escogencia. E ta un mester.” Asina e lider di AVP a bisa bon cla. A puntra Mike Eman di unda Bo ta saca e placa pa paga pa esey? Mike Eman: “Bo tin cu wak unda bo ta corta y Bo tin cu fiha prioridadnan cu ta na interes di henter Bo pais y pueblo. Specialmente di esnan den un situacion critico manera nos pensiondonan ta awor aki. Pero no por ta asina nunca cu tin 500 miyon florin extra ta drenta caha di gobierno y gobierno actual no ta ni pensa pa sikiera redobla e reparatietoeslag di nos pensionadonan. It’s a must. Mester a haci’e caba. Pero nan tin otro prioridad. MEP no kier haci’e. AVP si ta bay haci’e.” 

Mike Eman: “Si Abo como gobierno no por percura pa su grandinan tin un entrada pa nan por biba den un forma digno y sin e preocupacion si nan ta come mayan of cu nan tin awa y coriente, Bo no merece di ta gobierno,” asina Eman a declara. “P’esey Bo ta gobierno. E gobierno cu Aruba tabata tin 7 aña pa wak kico pa haci pa nos grandinan. Pero nan no a haci net net nada. Pesey nos pensionadonan ta biba den pobresa den nan propio pais y e gobierno ta gaba cu e si tin un surplus riba presupuesto y cu segun e cos ta bay bon na Aruba. Esta un berguensa.” 

DAY AFTER EVELYNE WEVER CROES

PENSIONADONAN LO CONOCE MEHORACION 

Mr. Mike Eman: “Dia cu pueblo di Aruba a pone AVP den gobierno, nos a drecha fondo di pensioen sin keha cu MEP a casi lagu’e bay bancarota. Nos a percura pa tur hende tin un miho entrada sin keha cu MEP a bolbe neglisha pueblo menos nan mes. Nos a drecha scolnan, cayanan, barionan y centro di ciudad sin keha cu MEP a laga nos pais na ruina. Awor atrobe e gobierno di MEP ta neglisha nos pais y lagu’e atrobe na ruina. Mescos cu nan ta haci cada biaha cu nan ta den gobierno.” Mike Eman a declara enfaticamente: “Ora cu nos drenta gobierno atrobe, nos lo mester bolbe drecha un cantidad di cos cu MEP a bolbe daña y neglisha. Y nos lo drecha e situacion pa pensionadonan. Pasobra no ta husto pa tur e pensionadonan aki ta bida den miseria y preocupacion den nan propio pais y gobierno ta gaba cu e tin surplus di placa, pero no ta us’e pa drecha nan entrada. AVP si lo uza e surplus di gobierno pa duna tur pensionado un entrada husto atrobe.”