Durante di su discurso diadomingo ultimo den e Encuentro cu Boluntarionan 2019, sr Robert Candelaria miembro di fraccion di AVP den Parlamento, a recorda tur presente kico partido AVP semper a para p’e y tur progreso cu pueblo di Aruba a conoce bou gobernacionnan di AVP.
“Desde inicio, ya prome cu aña 1942, AVP tabata un Partido cu a sirbi Aruba cu su principionan cla su dilanti, manera un compas cu ta guia den e direccion di progreso.

AVP tabata e Partido cu a:
Inicia e proceso pa nos Status aparte pa asina nos tin autonomia den gobernacion;
AVP a duna contenido na construccion di nos pais door di tabata traha riba e fundacion di entre otro
e prome scol,
e prome universidad,
e prome waf
e airport etc,

AVP a funda diferente instituto den nos pais y a crea e confiansa propio den nos pueblo pa dirigi nos pais nos mes;
E ultimo 8 añanan di gobernacion di AVP no tabata diferente, nos partido a sigui cu mesun animo di semper pa hiba Aruba na un miho nivel di desaroyo. Un miho desaroyo pa un y tur y no djis pa algun.
AVP no a solamente inverti den infrastructura y energia renobabel. Tambe a inverti hopi den su hendenan; Den nos prohimo. Algun ehempel ta:

A bini cu un Centro Ortopedagogico;
A bini cu sociale vormingstraject hunto cu nos militarnan pa train hobennan y duna nan disciplina y yuda nan den nan oportunidad pa futuro;
A salba nos pensioenfonds hunto cu gremionan;
A introdusi pensioen general pa tur hende;
A cumpli cu pago di indexering pa empleadonan publico;
A mehora e forsa di compra di esnan cu mas tabata mester di esaki manera:
subi onderstand cu 25%;
introdusi kinderschooltoeslag pa famia cu ta den onderstand cu Afl 250 adicional pa gastonan di scol;
A introdusi reparatietoeslag;
A aumenta entrada minimo;

A bini cu Programa Bo Bario cu ta duna asistencia den bario y asina por sigui menciona hopi mas ehempel cu a yuda esnan den nos comunidad cu tabatin mester di un man di apoyo y yudansa.
Tin ora nos ta core e riesgo di lubida di unda nos a bin. Nos por lubida tin ora kico nos a haci den pasado y asta ken nos ta pero mi tey pa bisa boso awe, cu tin bon noticia.

Tin bon noticia pasobra nos Partido si no a lubida ken e ta y su focus nunca no a cambia. Su kompas tey firmemente dunando e direccion pa progreso y victoria un biaha mas.
Pakico mi ta menciona tur e ehempelnan aki? Pasobra “our actions, truly speak louder than our words”. Nos ta un Partido cu ta prefera di scucha “well done” na lugar di “well said”.

Y un biaha mas nos tey pa recorda tur esnan presente y tur cu ta scucha, cu pueblo di Aruba hunto cu e Partido aki a yega di alcansa cosnan grandi, aunke nos ta un comunidad chikito. Laga nos lanta para atrobe, lora man di caminsa, pone man na obra. Laga nos compronde cu nos pais ta haci un yamada un biaha mas riba nos pa uni y dun’e un man. Un biaha mas bo pais ta spera pabo duna di bo mes pa sirbi, sin busca recompense propio, pero spera solamente e recompensa di un miho Aruba,” Parlamentario Robert Candelaria a bisa tur presenta na e actividad di Boluntarionan di partido AVP diadomingo ultimo.
‘