Na salida di e presentacion di Departamento di Asunto Social y Oficina Central di Estadistica diabierna na Parlamento, miembro di fraccion di oposicion, drs. Mervin Wyatt-Ras a enfatisa cu ademas di investigacion, pueblo mester di asistencia pa contraresta e tendencia di empobrecemento cu tin actualmente.
Mientras cu fraccion di MEP a yama e reunion cu intencion contradeci e ponencianan di AVP y di pinta un imagen bunita, e cifranan concreto a mustra tur lo contrario; casi mita di e casnan na Aruba ta biba bou di e standard minimo.
Pa Wyatt-Ras tabata hopi importante pa tin un bista riba e situacion di pobresa den comunidad. E no ta nada nobo, ya cu e ta algo cu nan ta experiencia durante contacto cu pueblo. A bira comun cu hende no por pone pan riba mesa mas y cu costo di bida a bira demasiado halto pa nan. Esey ta inclui schoolgeld, gasolin, cuido medico y remedi.
Un di e preguntanan cu e parlamentario di AVP a haci na CBS ta relaciona cu e hecho cu tin hopi persona cu no ta riba e radar di departamento, sinembargo nan ta sea adulto mayor cu malesa cronico of mucha cu condicion special, etc. Wyatt-Ras a compronde for di CBS cu proximamente kier haci un investigacion di presupuesto pa wak con persona na Aruba ta maneha nan entrada. Wyatt-Ras a enfatisa cu mester enfoca riba e grupo cu mayor vulnerabilidad.
“Na e momento aki nos poblacion no mester solamente di investigacion, pero tambe di asistencia pa sobrevivi e situacion economico real. Na luga di haci esey, Gabinete Wever-Croes ta busca tur sorto di manera di sconde, tapa of cambia e informacion cu ta duna na pueblo pa laga mustra bon,” asina e parlamentario di AVP a comenta durante un conferencia di prensa hunto cu lider di partido, mr. Mike Eman.
Wyatt-Ras a sigura cu AVP ta keda pone e punto aki riba agenda di partido ta keda sali na defensa di e pueblo su cartera pa e calidad di bida den pueblo ta uno digno. “Nos ta keda enfoca riba dje, manera nos a haci simper durante tempo cu nos tabata na mando,” asina e parlamentario a conclui bisando.
