Durante dia di awe Lider di Partido AVP, mr. Mike Eman y parlamentario drs. Mervin Wyatt-Rasa haya e oportunidad di sinta cu “outbreak management team” di dr. Horacio Oduber Hospitaal cu ta maneha henter e reto grandi di Covid-19
Tur esaki relaciona cu e presentacion di e relato “COVID-19 DEN PERSPECTIVA” cu e dia anterior a entrega na director di dr. Horacio Oduber Hospitaal, Jacco Vroegop y dia di awe entrega na nan persona tambe.
Despues di esey a continua cu reunion cu SIMAR cu tambe a contribui na e rapport. Partido AVP a tene un serie di consulta cu expertonan medico, social y di enseñansa, pa haya tende di nan con nan a atende cu e situacion cu e enfermedad contagioso aki a crea pa nos bida diario, kico ta e daño cu el a causa, dicon cosnan a bay manera nan a bay for di nan perspectiva y kico mester haci pa nos comunidad ta miho prepara pa crisisnan similar den futuro. E brainstorming aki a tuma luga dia 20 di augustus 2020.
Durante e reunion tin algun punto cu a resalta, den e relato traha y entrega ta poni cu ta importante pa bini cu un estudio con a maneha e crisis te awo y con por mehora; y na di dos luga, e 35 miyon corta den cuido medico mester ser aloca atrobe. Na e momentonan aki, Aruba no por permiti su mes pa corta den cuido medico. E ta causa danjo y hasta fayecimento di ciudadanonan cu no ta haya e atencion debido na Covid-19.
Specialmente pa locual ta trata enseñanza a sinta cu SIMAR y con tin cu vigila e apertura di scolnan, con pa esaki bay den un forma mas sigur y pa e hobennan cu ta hallando educacion digital / virtualmente, enberdad por haya educacion cu nos tin cu garantisa pa nan.
Nos ta apenas na e comienso di un caminda pa futuro desconoci. E experiencia y recomendacionnan den e relato aki ta pa yuda nos siña mas, mas lihe y miho con pa organisa cuido di salud y bida den nos comunidad pa futuro.
E raport aki ta disponible riba www.avp.aw. E comision organisado di e encuentronan cu expertonan ta mr. Mike Eman, drs. Mervin Wyatt Ras, mr. Gerlien Croes, Robert Candelaria y drs. Rene Herdé. E comision organisado tabata asesora pa conseheronan drs. Anco ringeling y mr. Nicole Hoevertsz.
