Lider di fraccion di AVP, sr Marlon Sneek a declara cu pa algun tempo caba a nota e rumbo cu enseñansa ta bayendo y cu fraccion di AVP a señala esakinan caminda prome cu reces di Parlamento, a solicita na mas cu cuater ocasion un reunion cu Minister di Enseñasa.
Sr Sneek a sigui mustra cu lamentablemento Presidente di Parlamento no a yama e reunion aki y awe por mira cu constantemente ta sigui haya problema pa loke ta enseñansa.

“Por a mira cu siman pasa muchanan cu mester a cuminsa e ‘avondleergang’  no por a cuminsa ya cu tabatin discusion riba e forma con Minister kier bay trata cu e salario di e maestronan m y nos por a mira e maestronan para  pafo y nos a anticipa e problema aki.

Nos a papia y a señala e problema aki ya cu Minister no por kere cu e ta bay trata un maestro di scol manera un trahado di un ‘uitzendbureau.’

Pesey den pasado durante di e prome Gabinete Mike Emanm nos a cambia leynan laboral pa asina garantisa seguridad di trabou pa un hende, hasta ora e ta traha c’un ‘uitzendbureau’  caminda den pasado nan no tabata paga e trahadonan aki ora nan bira malo, e ley a wordo cambia y no por papia mas di no work, no pay.

Awe nos ta mira maestronan di scol, hendenan cu a inverti   hopi tempo y  placa pa paga nan estudio te cu nan a caba,  ta wordo trata manera trahadonan di tercer grado  y awe kier duna un maestro di scol un contract di ‘no work, no pay.’

Pues despues c’un maestro traha lunanan largo, cansa curpa  y hasta kisas haya un burn-out , haya stress  dor di mesun trabou y bo no por presenta na trabou, awor ta resulta cu Minister a dicidi cu esun cu no bin trabou, lo no wordo paga su salario

Un locura di otro mundo ya cu pa añanan largo, den e caso aki  ora cu un maestro bay traha pa 

OAS, cu ta un otro stichting, pues e maestro  firma contract c’un otro stichting, automaticamente e stichting aki mester duna e maestro e condicionnan di trabou cu esaki ta rekeri cune.

Nos ta lamenta c’un biaha mas por mira cu Minister Lampe ta keda insisti pa wak den spiel, papia di pasado, cu awor ta ehecuta e ta ehecuta plannan di AVP y argumentonan ridiculo asina.

Tur hende por corda e shownan cu tabatin caminda supuestamente Minister Lampe a insisti cu durante cambio di gobierno, no tabatin overdracht di e ministerio di educacion, insistiendo entre otro cu Ministernan di AVP a  bay cu computer, bay cu tur cos y no a laga nada atras.

Awor di repente tin document y cu e ta bay ehecuta decisionnan di 2016, tres aña despues cu e Minister cu tabatin e encargo no a ehecuta, pero nan sin ta bay ehecuta un supuesto advies cu e minister anterior a haya.
Ta di lamenta cu cada bes minister Lampe no por asumi e responsabilidad di bisa cu su persona a tuma e decision aki, cu e ta kere den dje y ta para pa e decision cu e tuma y Lampe ta keda insisti pa sconde tras di otro hende, pa decisionnan malo cu e ta tuma.

Mescos nos a mira den NDC ora cu el a bisa cu NDC ta bay cay bou di Minister Presidente, cu Tra’s Merdia ta bay cay bou di Minister Glenbert Croes y si e sigui asina un bes e ta keda sunu y e por keda su cas drumi mes pasobra e no tin niun autoridad den enseñansa.

Di 100 decision cu el a tuma, 110 tabatin problema y nos ta lamenta cu nos mester bisa cu ora fraccion di AVP a pidi un reunion publico, meramente pa atende cu e problematicanan aki, ya cu e maestronan aki ta yega tur dia cerca nos, entre otro carta cu Minister a manda pa e trahadonan, fraccion di AVP tambe a haya esaki, firma pa Rudy Lampe.
E kehonan di maestronan aki ta  yega tur dia cerca nos  y pesey nos a pidi un reunion ya cu e hendenan aki kier un claridad di kico ta bay pasa di nan trabou, kico ta bay para cu nan futuro.

Awe nos ta mira c’un biaha mas tin problema den enseñansa  y supuestamente dia 9 scol ta cuminsa pero ainda no tin claridad kico a bay pasa cu e maestronan aki cu nan contract y nos ta mira si nan no bay haya nan contract manera cu pa 30 aña largo ta hayando esaki, Minister Lampe a yega cambia cos, sin tene cuenta cu nada y mi ta kere cu a bay tin problema y posiblemente e scol lo no bay habri dialuna awor  y nos ta lamenta e cos aki pasobra cada bes di nobo, Minister Lampe ta insisti pa corta den enseñansa y esey ta di lamenta, ya cu bou di ocho aña di gobernacion di AVP, presupuesto di enseñansa a conoce un crecemento di 80 miyon florin.

Presupuesto di enseñansa na 2017 a keda na 20% di e presupuesto total di e pais y awe por mira cu e gobierno   actual ta busca un manera pa corta den esaki y esey ta di lamenta ya cu enseñansa ta e futuro di cualkier pais.

Ta imposibel cu ta bay corta y sigur no den ‘avondleergang’ pasobra meramente avondleergang ta pa muchanan cu pa un of otro motibo cu no a caba e trayectoria regular, ta bay busca un di dos oportunidad, sea como coolmonteur, automonteur, carpinteria y awe hasta den e grupo ey minister Lampe kier corta. Ta un cos serio y ta di lamenta cu ora nos ta pidi un reunion publico cu Minister Lampe pa nos atende cune riba cada un di e puntonan menciona, caminda por bisa e minister den cual direccion nos ta kere cu e tin cu bay, opositornan ta hunga wega politico, pidiendo un bijeenkomst y Presidente no ta yama e reunion y esey pa nos ta condenabel,” lider di fraccion di AVP, Marlon Sneek a declara.