Mientras cu e presupuesto pa aña 2020 y e leynan cu ta forma parti di e di dos fase di e reforma fiscal ainda ta desconoci na Parlamento, e unico documento cu nos a ricibi ta e conseho di CAFT riba e leynan aki. Esaki ta e unico fuente di informacion cu nos tin pa nos a haya un idea mas o menos kico ta spera nos pa loke ta trata aumento di impuesto pa aña 2020. E conseho aki ta obtenible riba nan website y tur hende por verifica su contenido.
A base di e conseho di CAFT nos a nota cu tin un shift masha grandi mes entre impuesto directo pa y indirecto. Si compara e gasto y entradanan total cu e ultimo presupuesto cu Gabinete Mike Eman II a laga atras na 2017, nos ta papiando di 82 miyon florin mas na gasto compara cu 2017 y 212 miyon mas na entrada na 2020. E diferencianan ta exorbitante y den e periodo proyectonan infrastructural PPP no a suma mas cu 28 miyon di florin. Pues gran parti di aumento di gasto, ta relata na gasto di operacion di gobierno.
Conseho di CAFT ta mustra cu ta danki na e medidanan cu a cumula for di 2018 pa 2020, ta loke ta laga gobierno yega na e normanan pa aña 2020 siendo un surplus di 0.5%. CAFT ta constata cu gastonan di gobierno a aumenta cu 40 miyon mas na 2020. Segun CAFT, Gobierno ta conta tambe cu entradanan incidental di 55 miyon. Esaki no solamente ta algo cu e parlamento nobo aki a bisa di lo no hasi y Gobierno a acorda cu Hulanda di lo no conta cu esakinan pa yega na e normanan, pero pa di tres aña consecutivo e norma stipula ta wordo logra door di entradanan incidental. Ta desconoci ki balor ainda e protocol cu Hulanda tin mirando cu no a logra ankr’e den ley, ni ta cumpliendo cu e palabracionan riba e reglanan presupuestario.
Den nan conseho, CAFT a mustra cu un suma di 153 miyon ainda cu no tin decision ainda riba nan, e transferencia pa caha di Gobierno mester tuma lugar ainda, of simplemente tin mester di cambionan di ley pa logra e entradanan aki. Pues gran parti di e 153 miyon aki ta parti di e reforma fiscal. E cifranan cu e conseho di CAFT referi na dje ta cifranan anual. Como cu ya caba nos ta na februari, nos no sa cuanto realmente di gobierno lo ta premira di ricibi na entrada pa resto di aña ni tampoco con esaki lo afecta e norma.
CAFT a conclui cu, mescos cu e prome fase, e di dos fase di reforma fiscal no ta nada mas cu un aumento di impuesto pa ciudadano, un aumento di impuesto pa comerciantenan y un aumento di impuesto pa turistanan cu ta nos pilar economico. Den aña 2018 y 2019 nos a conoce un aumento di 255 miyon pa loke ta trata e peso di impuesto y e aña aki e impuestonan lo aumenta cu 88 miyon mas: mas cu 340 miyon den menos cu tres aña. Gobierno no a mustra ningun intencion genuino pa reduci y ta pasa e cuenta pa pueblo.
Ademas di e reforma fiscal, Gobierno ta premira 60 miyon di dividendo di empresnan estatal, di cual mita di nan ta dividendonan extra cu indirectamente lo afecta ciudadadonan y comercio. Riba dj’e ta pone e empresanan aki cumpra e terenonan erfpacht unda nan ta situa, aumentando asina e gastonan di operacion. Esaki tin como consecuencia cu gastonan produccion di utilidad lo aumenta y di un manera of otro e empresanan mester mantene nan rationan” Parlamentario Richard Arends a declara.
