Awe lider di fraccion di AVP mr Mike Eman a manda den nomber di su fraccion y di mayornan cu tin yiunan na scol, un peticion urgente pa Prome Minister sra. Mr. Evelyne Wever-Croes, pa tuma precaucionnan mes ora pa yuda famianan y enseñansa na Aruba. E peticion urgente aki ta relaciona cu e aumentonan alarmante di schoolgeld, principalmente pa famianan cu un entrada abou, e gastonan adicional halto pa articulonan esencial pa alumnonan di EPB y e falta di subsidio na scolnan particula pa por keda ofrece enseñansa di calidad.
Fraccion di AVP y e mayornan ta sumamente preocupa pa e falta grandi na subsidio y sosten financiero di gobierno na institucionnan di enseñansa na Aruba manera SKOA, SPCOA y SEPB. Esaki a conduci na aumento di ‘schoolgeld’ impagabel cu ta menasa acceso na enseñansa pa hopi den nos comunidad.
Eman ta menciona e aumentonan: “Pa scolnan di MAVO e schoolgeld a subi di 175 florin na 2015 pa 250 na 2021, un subida di 43% y pa 2023/2024 tin un suma inacceptabel planea di 350 florin loke ta un aumento di nada menos cu 40%. Pa scolnan basico e situacion ta pio ainda. Nan ta mira un subida di 175 pa 275 loke ta 57%. Pa kleuterscholen di SKOA e suma a subi drasticamente. Di 150 pa 250 florin, loke ta un aumento di 66%. Tur esaki ta hopi preocupante. E aumentonan incontrolabel aki ta afecta e stabilidad financiero di majornan y di scolnan den forma alarmante y ta forma un menasa e derecho riba enseñansa. Riba tur e sumanan menciona – na casi tur scol – ta bin ‘aircogeld’ aserca di 150 florin. Un famia promedio di tres (3) yiu cu ta bay scol, un na kleuter, un na scol basico y un cu ta bay MAVO, mester paga e suma di 1325 na school- y airco geld prome cu nan jiunan por cuminsa atende scol. E aumentonan di scolgeld na EPB tambe ta enorme. E prome tres añanan ta wordo aumenta di 125 pa 280 florin y pa e di cuatro aña ta bay di 150 pa 330 florin.”
Eman den nomber di fraccion di AVP ta haci un yamada urgente riba Gabinete di Prome Minister Wever-Croes pa riba termino hopi cortico tuma e siguiente decisionnan esencial:
Aumento di subsisdio pa scolnan: Fraccion di AVP ta boga pa un aumento substancial di subsidio pa scolnan, esaki conforme e principio di igualdad manera ancra den nos Constitucion. Esaki lo haci posibel pa alivia mayornan di e gastonan financiero pisa, mehora maneho di scolnan particular, crea e posibilidad pa mehora e posicion di maestronnan di scol y tambe soluciona e problematica di subsidio di werksternan.
Aumento substancial di aumento di schoolkinderentoeslag: Ta urgi gobierno pa aumenta den forma substancial e ‘schoolkinderentoeslag’ pa famianan cu un entrada abou. Asina famianan por paga schoolgeld y otro gastonan di scol pa nan jiunan sin mester kibra nan presupuesto mensual.
Compra di parti di gobierno di ‘laptop’ pa alumnonan di EPB: Fraccion di AVP ta urgi gobierno pa gobierno cumpra e laptopnan cu
alumnonan di EPB tin mester. Esaki ta esencial pa nan por participa den forma activo y efectivo na enseñansa digital y pa nan sigui stimula nan crecemento intelectual.
Eman ta enfatisa cu ta responsabilidad di gobierno di Aruba pa garantisa acceso na enseñansa di calidad halto pa tur hende den comunidad. Un enseñansa cu ta bon financi’a y sosten na famianan cu un entrada abou, ta crucial pa adelanto y bienestar di henter comunidad.
Fraccion di AVP ta haci un peticion urgente riba Prome Minister Wever-Croes pa tuma accion mesora y ehecuta di inmediato e desicionnan di sosten essencial na famianan y na scolnan aki. Mike Eman: “Esaki lo percura pa enseñansa di calidad keda accesibel pa tur alumno na Aruba.”
