“Na aña 2018 señora Karen Mademilia Henricus a duna muestra di hopi curashi, ora el a tuma e paso pa scirbi un buki di su experencia propio cu abuso sexual.

Su buki yama “Surviving a pedophile” cu ta un buki hopi doloroso pa lesa, pero na mes momento, mi kier recomenda tur hende pa lesa e buki aki. 

Señora Mademilia ta splica kiko el a experencia den su pasado di abuso sexual di parti su tata y esaki a sosode pa hopi aña. E ta splica tambe con su persona a siña deal cu e trauma aki pa cual awor e por yuda otro victimanan  cu tambe a pasa den experencianan similar. 

E ta splica den su buki pasahenan hopi doloroso con el a deal cu esaki y con, cu yudansa di Dios, el a logra sobrebibi e trauma aki na man di un pedofiel.” 

CASO RECIEN

Parlamentario Candelaria a sigui mustra cu motibo pakico su persona a cuminsa referi na e buki ‘Surviving a pedophile’ di señora Mademilia, ta pasobra algun dia atras por a tuma nota di un caso hopi tristo trata den Corte, na unda un tata a viola su propio yiu te cu a hoben aki a sali na estado. E ta hopi cruel pa mira con banda di tur esaki, e tata a nenga dilanti di Hues cu el a haci e hecho horibel aki pero ora a confronta e tata cu prueba, el a reconoce y admiti kico el a haci. 

Cu Dios yuda e hoben aki y tur cu a y ta sufri cune, señor Candelaria a mustra.

Loke por a tuma nota di dje den prensa ta cu si e hoben no a sali na estado y mester a sufri extra ora a aborta e baby den su bariga, prueba di e berdad horibel aki tal bes lo no a sali pa dilanti. E lo a keda palabra di e tata kende a abusa di dje, contra di su yiu kende a pasa den e experencia traumatico ey. 

UN DI MAS

“Mi kier trece e punto aki pa dilanti, pasobra mi a ser acerca dor di diferente hende den nos comunidad cu ta sinta cu e dolor aki di abuso sexual miho conoci como pedofilia en contra di nos muchanan. Esaki ta algo hopi alarmante y nos como pueblo no por keda keto y acepta esaki manera nada no a pasa. Cada abuso y violencia domestico ta un di mas. 

Nos tin entendi cu e caso di abuso y violencia domestico ta halto y alarmante. Nos mester corda cu cada ser humano ta merece amor, respet y proteccion. Conociendo diferente hende cu a pasa den e trauma aki manera señora Mademilia, mi sa cu e ta algo cu ta marca e persona pa resto di su bida. 

EX VICTIMA

Pero na mes momento mi kier para keto na un punto cu hopi biaha nos no ta papia di dje pa e rabia cu e abuso sexual y violencia domestico ta causa den nos como hende, cu e abusado hopi biaha tambe por tabata un victima e mes. Dor di no a ricibi ayudo profesional na tempo, hopi biaha e personanan aki ta scohe pa ripiti e hecho doloroso cu nan mes a pasa aden. 

YUDA VICTIMA 

Hopi biaha pedofilia ta bay man den man cu menasa of violencia contra e victima. Aki nos mester uni pa medio di gruponan profesional y tambe c’un pueblo alerto pa yuda e victimanan pa no acepta esaki como algo normal. 

Nos mester conscientisa nan pa nan papia y haci denuncia. Nos mester stimula nos pueblo pa saca pedofilia for di den scuridad y pone den lus, caminda cada departamento mester uni forsa, experticio y profesionalismo na fabor di e victima pero tambe pa evita cu e abusado ta ripiti den futuro e mal hecho cu a sosode. 

Nos mester encurasha cada persona cu bira victima di violencia sexual of domestico, pa no keda keto. Nos tin cu conseha e victima pa e no tene miedo y laga e manipulado sigui manipule of menace. Nos mester conseh’e y yud’e pa e busca un hende di confiansa pa papia cune pero primordialmente pa e haci su denuncia mesora na polis of otro instancianan oficial. 

ASOMBRO

Mi a keda hopi asombra ora mi a tuma nota di 4 aña y mey cu e tata cu a saca su yiu na estado a haña como sentencia, sabiendo cu e castigo maximo actual ta 8 aña. Aunke cu mi no sa tur detaye di e caso menciona, e pregunta cu ta keda den pueblo y sigur cerca mi, fungiendo como bos di pueblo, ta di con a opta pa pidi un castigo, asina abou pa e tata,?” Parlamentario Robert Candelaria a mustra.