Parlamentario Robert Candelaria den conferencia di prensa a mustra cu e topico di e asina yama Landspakket ta sumamente preocupante pa hopi den nos comunidad. E motibo ta e hecho cu nos Prome Minister a entrega gran parti di Aruba su autonomia. “Nos ta bisa esaki pa motibo cu ora lesa e Landspakket y tur e deadlinenan den dje, e pregunta cu ta lanta ta, kico ta sperando nos y riba cua topico Aruba no tin nada mas di bisa?

Un ehempel ta e punto E-8 den e Landspakket cu ta parti di e ‘Economische hervormingen’. Aki ta trata di e ley yama Landsverordening toelating uitzetting verwijdering (LTU V) cu mester wordo cambia. Esaki ta bisa cu ‘de LTU V zal worden geïmplementeerd, zodat gezinsleden van uitgezonden Rijksambtenaren van rechtswege worden toegelaten tot het land Aruba.’

Cu otro palabra, si e ley aki pasa, miembronan di famia di funcionarionan publico Hulandes cu lo bin traha na Aruba, mester wordo admiti automaticamente. Cada parlamentario ainda mester vota  si ta pro of contra e cambio aki. Pero den e documento di e Landspakket, e punto aki a wordo registra como un punto cu ta cla caba, ‘done deal.’

Aki ta bon pa mustra pueblo, cu e reunion cu Parlamento di Aruba tin cu trata e ley aki, ta tuma luga dentro di algun dia, pues e ley no a wordo cambia ainda. Pues con por ta posibel cu den e documento e punto aki ya ta cla caba y Parlamento di Aruba no a vota riba dje mes ainda?

E pregunta ta si ainda Parlamento di Aruba tin algo di bisa pa cu cambio di ley? Of gobierno ta impone cu e fraccionnan cu ta sostene gobierno mester pasa e cambionan den e ley di LTU?

E desaroyonan aki ta preocupante ya cu gobierno di Aruba y gobierno di Hulanda ta confirma cu e cambio den e ley pa permiti famianan di funcionario Hulandes drenta Aruba sin problema algun, ya ta un hecho caba pero Parlamento mes no a vota mes riba e cambio ainda. Ta tipo di desaroyonan asina ta lanta ainda mas speculacion y preocupacion pa ora por ehempel Parlamento mester bay trata e ley pa introduci BTW di 12.5% y ora cu tin cu bay cambia leynan laboral caminda por kita hende mas lihe for di trabou.

Parlamento lo por discuti libramente riba e cambionan aki of desicion a cay caba con mester vota? Parlamento por rechasa e cambio di ley aki y si dado caso Parlamento rechasa e cambio di ley di LTU V, kico esey lo nifica? No ta bay tin placa mas pa Aruba?

E tipo di preguntanan aki nos tin cu sigui haci nan ya cu e documento cu Prome Minister a firma cu Hulanda ta desconoci ainda pa Parlamento. Ta solamente algun tabel y algun punto c’un parti di fecha cu vinkjes nos a logra mira.

Esaki ta cosnan cu mester bin claridad riba nan hopi lihe mes pasobra e pais aki tin cu wordo goberna pa y na bienestar di su mesun hendenan. Ora c’un Prome Minister drenta avion y bay Hulanda y firma pa entrega gran parti di nos autonomia, sin duda nos ta preocupa kico esaki lo nifica pa e gobierno aki y pa tur gobierno cu ta bin despues. Con bo por bay cerca pueblo y puntra kico nan kier pa bo haci como gobierno pa asina goberna e pais bon pa nan, si esaki no ta den man di nos gobierno mas?

AVP ta sigui mustra cu e tipo di cosnan aki ta sumamente robes y contra e beneficio general di pais Aruba. Parlamento tey pa controla gobierno y pasa leynan pa Aruba. Pero ora cu hasta e poder pa haci esey wordo kita for di bo, nos ta hopi preocupa kico esey ta nifica pa futuro di nos pais.” Robert Candelaria, Parlamentario di fraccion di AVP  a declara.