Gabinete Wever Croes ta un gobierno cu por haya e apodo di un ‘gobierno puzzel’ forma pa partido MEP, POR y RED cu segun añanan ta pasando, ta mustra riba un puzzel complica caminda falta pieza na tur momento pa completa esaki.
Un bon muestra di esaki ta cu presupuesto 2020, cu ta colma di mas medida cu lo ranca miyones atrobe for di cartera di pueblo, mester a wordo entrega na luna di September segun ley di comptabilidad pero pa terkedad y incapacidad di e gobernantenan di e gobierno aki, e siman aki cu luna di Januari ta cabando, ainda Parlamento no a haya e presupuesto aki pa studia y trata den Parlamento.
“Seis luna lo cumpli e siman aki cu presupuesto 2020 ainda no ta cla ya cu tin cantidad di problema ainda pa wordo atendi prome cu esaki wordo presenta na Parlamento caminda gobierno tin cu bay controla si e tin su 11 miembronan hunto pa atende y aproba esaki.
E situacion di inseguridad aki ta reinando tur dia den gabinete Wever Croes, ya cu cualkier miembro cu lanta cu mal beis, of cu no ta contento cu loke nan mes ta desea of kier mira, gobierno ta den problema.
E caso di Luigi Bergen ta gran ehempel di esaki caminda practicamente tin tin existencia di e gobierno den su planta di man, ya cu si no cumpli cu su demandanan pa e hala un banda y entrega su asiento, e lo no move y gobierno lo no tin mayoria.
E unico caminda cu Luigi por bay aworaki si en berdad e gobierno aki ta traha a base di integridad, ta e tin cu bay scol bek, su posicion cu el a laga ora cu el a gobierno a sinta y cualkier posicion cu Luigi wordo duna na e momentonan aki, ta muestra total di e falta di integridad di gabinete Evelyn Wever Croes.
Realmente nos por papia cu gabinete Wever Croes no tin derecho di existencia, sigura mirando tur loke a bin ta tumando luga caminda pueblo no ta bin na remarca mes pa haya algo positivo, algo cu por yuda famianan rond Aruba, caminda nan lo por haya alivio financiero pa e aumento di costo di bida crea pa e gobierno actual.
Criminalidad ta yegando un nivel hamas bisto aki na Aruba, na man di un Minister di Husticia Andin Bikker, cu a priminti cu e lo a caba cu criminalidad pero realmente a haci net nada pa cumpli cu e promesa aki.
Den tur bario, den tur skina di Aruba casonan di ladronicia a aumenta, atraconan a bira un actividad diario, caminda hendenan ta buscando placa den forma desespera y mirando cu lo tin mas medida na caminda, por spera cu e situacion aki lo sigui empeora y pueblo lo sigui biba den un ambiente di miedo y inseguridad.
Problemanan social cu tanto gabinete Wever Croes a priminti di lo soluciona, ta sigui bira mas grandi, ya cu realmente e plan social di e gobierno, ningun hende ta mira su efecto, ningun hende ta mira kico ta wordo haci pa alivia e problemanan social cu tanto Minister Glenbert Croes y Prome Minister Evelyn Wever Croes a priminti cu nan lo soluciona.
A pone miyones un banda pa e plan social aki pero pueblo no ta mira beneficio algun di e plan aki y practicamente tur dia por mira e problemanan social cu ta sigui crece tanto den cas como na scolnan, den bario y den e sector laboral.
Ayera practicamente gobierno a cera porta di Citgo por completo, caminda cantidad di tata y mama di famia a wordo manda cas sin cu gobierno tin un solucion pa nan y e cifra di desempleo ta sigui subi.
E situacion ta hopi alarmante sigur ora cu scucha Minister di Turismo Dangui Oduber declara oficialmente cu su gobierno no tin ningun proyecto pa ehecuta y bisando cu e unico proyectonan cu ta den ehecucion na e momentonan aki, ta proyectonan cu nan a herede di gabinete Mike Eman y cu di su propio gobierno pueblo no por spera mucho.
Na momento cu gobierno kier bin Parlamento pa atende cualkier asunto importante, tin cu bay haci un tipo di ‘censo’ den e tres fraccionnan cu ta sostene e gobierno, pa mira sin nan tin 11 sigur na momento di yama un reunion cu ta muestra cla cu gabinete Wever Croes ta un puzzel cu simplemente por cay den otro na cualkier momento.
Pueblo ya a perde tur coneccion cu su gobierno, pueblo a perde tur speransa di haya loke tanto a wordo priminti na pueblo, esta cu costo di bida lo baha, cu criminalidad lo baha, cu prijs di gasolin lo baha, cu prijs di awa y coriente lo baha mientras cu gobierno mes no por ni sikiera keda cla cu su presupuesto 2020,” sr Melvin Tromp di AVP a mustra.
.
