Parlamentario Mike de Meza
Aruba ta conta c’un Prome Minister cu NO ta interesa den cumpli cu su promesanan electoral na e pueblo engeneral
Particuralmente San Nicolas menos!
Aruba a habri un aña nobo na merced di un Prome Minister y su gobierno, cu no ta interesa den bienestar general di su pueblo, caminda e hende sigur no ta central, algo cu pa dos aña largo el e demostra repetidamente.
Miembro di fraccion di AVP, Mike de Meza ta señala cu na ciera di aña 2019, na momento cu tur pero tur ciudadano, tata y mama di famia ta spera noticianan positivo, sperando cosnan bon pa bin den 2020, Evelyn Wever Croes ta demostra kende realmente e ta como hende y ki sorto di lider un pais e ta.
“Ya caba pueblo a sinti e incinceridad di e Prome Minister, un hende cu hunto cu su partido a drenta casnan rond di Aruba durante di campaña, a sigura pueblo cu nan lo drecha e situacion finaciero y tur otro problema di e pais, SIN cu e tin cu tuma medida pasobra e conose e materia y e a studia e materia. Tambe Evelyn a bende su mes como un persona cu tabatin solucion pa tur cos, e lo a percura pa alivia tur problemanan y retonan den pueblo pero ni dos luna na manda, el a traiciona tur cu a vota pe, su partido y pueblo engeneral presentando un pakete di medida caminda e la aumenta BBO cu 75% y hisa accijns cu 16% riba gasolina y diesel cu a causa hopi problema den tur cas rond Aruba. Awor el a pone otro medida riba lomba di pueblo cu un aumento di 46% riba diviezen provisie cu lo afecta prijs di TUR producto y servicio na Aruba. Esaki contrario na promesa cu lo NO a bin cu medida durante su gobernacion y tambe cu SI lo a baha e prijs di awa cu coriente cu 50%. Tambe cu SI lo a baha e prijs di Gasolina y diesel cu 50% y SI lo baha edad di pensioen bek na 60 anja! Pero te dia di awe pueblo no por mira nada di e promesanan di Evelyn.
Su enganjo electoral na pueblo no a caba eynan, ya cu ainda Evelyn Wever Croes cu su gobierno ta sigui impone medida riba pueblo y ta sigui trata di ranca entre 250 pa 300 miyon for di cartera di henter pueblo, pa asina e por cubri su e gobierno actual su incapacidad pa goberna y cubri aumento di gastonan innecesario cu ta benifesia y sirbi solamente e interes di “Friends and family” y NO di pueblo.
Ta tristo pa scucha ora cu pueblo di Aruba tabata pasando ultimo dianan di 2019, sperando riba noticianan positivo cu speransa cu gobierno lo cambia y stop abuso contra pueblo, Prome Minister ta anuncia cu pa su partido CITGO por bay pa caba for di Aruba.
E mesun Prome Minister aki cu a priminti cu su gobierno lo bay ta integro, ta bolbe traiciona un grupo grandi di trahadonan den e refineria na San Nicolas, caminda sin ningun tipo di remordimiento, ta bisa cu e refineria tin cu bay pa caba mescos cu lider anterior sr Nel Oduber di MEP a bisa Valero den 2007/2008 ora a introduci BBO riba export pa refineria y cu na 2009 Valero a stop su operacion di refineria y a manda tur contratista cas y pa cera operacion di refineria completo!
Ningun palabra di sosten pa e trahadonan cu lo wordo manda cas, ningun tipo di un vision caminda e gobierno actual lo a mustra pa prome bes cu e tin interes di e trahadonan y di e pais na pecho.
Aki Aruba a bolbe conoce e enganjo di su Prome Minister, kende semper ta papia cu su gobierno tin e “hende” central den su maneho, cu e ta lucha pa interes di e “hende” pero sin ningun tipo di convivencia, ta manda CITGO bay pa caba y laga tur e trahadonan aki cu nan famia pa nan cuenta. E arte di politika ta pa sinta na mesa y buska solucion cu ta sirbi interes general, pero e gobierno actual lideriza pa Evelyn ta kere den e arte di politika di “bully” pa nan por yega na solucion pa sirbi interes personal!
Increibel con un Prome Minister di un pais, por demostra un falta di interes asina den e ser humano, un falta di interes den economia di su pais, caminda despues di dos aña sin cu el a haci un solo esfuerso pa percura cu e proyecto di reapertura di e refineria wordo sigura, awor ta bin dilanti y bisa un disparate asina!
Sinembargo loke Evelyn Wever Croes, a haci cu e declaracion aki, ta bolbe demostra na pueblo cu partido MEP despues di Betico Croes, nunca a conta c’un lider cu a traha na interes di e digno pueblo di Aruba.
E negativismo y e rabia contra nos pueblo di San Nicolas, semper a wordo demostra tanto pa Evelyn y tambe pa e ex lider di MEP y ex Prome Minister, Nelson Oduber, kende tambe den pasado a haci mesun cos, ora cu bou di otro gobierno di MEP, a cera e refineria.
Na 2009 tabata Nelson Oduber como lider di MEP y como Prome Minister, a bisa e ehecutivo di Valero, sr Bill Klessy pa e pone e refineria riba su lomba y bay cune for di Aruba.
Exactamente 10 aña despues di e declaracion aki di Nel, otro lider di MEP y Prome Minister di nos pais, ta bin dilanti y bisa sin ningun tipo di compasion cu trahadonan di e refineria, cu ta miho pa CTIGO cera mas pronto posibel y nan bay for di Aruba.
Esaki ta e lidernan cu no tin interes di pueblo na pecho, cu no tin interes di San Nicolas na pecho y ta hendenan cu semper a traha pa sirbi interes di famia, amigonan y di sponsornan.
No ta di awo ta conoci cu tin diferente grupo ta tras di e baymento di e refineria di Aruba y e hecho cu nunca pero nunca Prome Minister a haci e minimo esfuerso pa sigui cu e proyecto aki, ta confirma practicamente cu e ta sirbiendo den cierto sentido, interes di algun grupo cu kier e tereno y otro ‘assesment’ di e refineria aki.
Prome Minister Evelyn Wever Croes nunca tabata sincero cu pueblo di Aruba, cu e clase trahado y el a demostra cu pa 2020 esaki lo no cambia y pueblo lo sigui haya su mes confronta c’un perdida di compra y aumento di su problemanan social y financiero,” Parlamentario Mike de Meza a mustra.
