Relaciona cu e situacion dificil cu nos hendenan ta hayando nan mes aden na e momentonan crucial aki na Aruba ExPromer Minister y Lider di AVP, mr. Mike Eman, ta di opinion cu e ayudo di gobierno mester ta mas amplio y delinea di pensamento hopi mas profundo dirigi riba futuro.

SOSTEN DEBIDO PA MANTENE CUPONAN DI TRABAO    

Mester garantisa cu empleadonan y empresanan ta sobrebibi e crisis. Despues di e crisis mester tin operacionnan commercial cu cabez riba awa pa re-start imediatamente. Esaki ta rekeri un maneho y pakete di sosten hopi mas specifico y dirigi riba e meta pa e weso di lomba di nos mundo empreserial sobrebibi e crisis tambe y lo tey pa re-inicia operacion. Esaki ta conta pa negoshinan y zzp’ers. For di reaccionnan di Comerciantenan Uni Aruba (CUA), Camara di Comercio, ATIA, AHATA, ACBA, ATSA y WAB por a sinti cu e pakete di gobierno no ta duna nan e apoyo cu nan ta desea y cu ta nan ta sinti cu ta altamente necesario pa nan por surpasa e crisis. 

950 FLORIN PA LUNA NO TA YEGA 

Di empleadonan y sindicatonan tambe por a sinti cu e pakete di 950 flrin no ta yega. Esaki ta logico ExPromer Minister mr. Mike Eman ta bisa. Segun e ultimo cifranan di CBS un persona cu ta biba su so mester di Afl. 2500,== pa luna pa por sobrebibi (Bestaansminimum). Un di famia di cuater, tata, mama y dos jiu, mester di Afl. 5000,== pa por sobrebibi. E ta bisto cu Afl. 950,== no ta bai alcansa e famianan aki. Gobierno mester bai enfoca tur recurso mas hopi dirigi riba esnan mas vulnerabel pa no crea un pobresa masal na Aruba. Ya caba promer cu e virus-crisis medidanan di Gabinete Wever-Croes a strangula e poder di compra. Awor e situacion ta hopi peor.

AWA Y LUZ 

Y pa esnan cu no tin voz y vocero nos tin cu papia. Pesey Eman ta bisa cu mester por pone awa y luz disponibel pa pueblo gratis, sigur esnan di menos recurso. Pa esnan cu un entrada di bao di Afl. 3500,== pa luna y logicamente pa tur hende cu na e momentonan aki nan no tin entrada, irespecto kico nan entrada tabata ta promer cu nan a perde esaki dor di e situacion actual.

AWA GRATIS PA CUNUCERONAN 

Awe mas cu nunca nos kier tin produccion local di fruta, berdura y cosecha en general di nos cunucunan. “Durante cu pa un periodo cortico mi a ocupa e cartera cu Minister Otmar Oduber tabata tin prome cu e a retira di nos industria primaria mi a yega na un acuerdo formal cu WEB y Utilities pa awa pa nos cunuceronan na un prijs hopi special. Corto despues tabata tin cambio di gobernacion y tarifa special aki pa sostene nos cunuceronan lamentablemente no a worde introduci”, ExPromer Minister Mike Eman ta bisa. Awor ta e momento pa cumpli cu esaki y cuminsando gratis te ora situacion normalisa y despues por introduci e tarifa substancialmente reduci pa sostene nos cunuceronan. Esaki ta importante tambe, pasobra nos tin hopi persona na cas cu kier haci algo pa keda activo y productivo pa nan sociedad.

UN PLAN NOBO PA ARUBA

Nos mester prepara cu nos hobenan professional y tur nos mihor hendenan e plan di recuperacion di Aruba, ExPromer Minister mr. Mike Eman ta bisa. Nos no por fiha simplemente riba crea e momento pa sigui cu “Business as usual”. Tin un oportunidad grandi tambe pa nos “reset y reboot” nos desaroyo social economico. Esaki pa mehora di biaha hopi tema cu pa anjanan largo nos a considera un debilidad den nos desaroyo. Tin un oportunidad pa “rethink” cosnan fundamental cu por bai haci Aruba den futuro un Pais hopi mas prospero, feliz y duradero. Un Pais cu oportunidad mas husto pa un y tur y cu instrumentonan pa tur iniciativa por haya un mihor sosten pa alcansa metanan desea. Un sociedad mas husto, cu un grado halto di harmonia y convivencia comunitario y cu ta respira un ambiente positivo y di optimismo pa alcansa lo mihor pa un y tur. Awor nos por bai pa un etapa nobo di desaroyo pa crea e Pais y sociedad mas saludabel, berde, duradero y feliz.