Durante e conferencia di prensa semanal di partido berde AVP, Parlamentario Robert Candelaria a hiba palabra y a expresa cu partido ta kere cu Aruba sigur merece miho.
Tur hende ta pendiente pa e reunion di diabierna awo, 14 di augustus, na momento cu Conseho di Minister di Reino reuni riba loke ta e pakete di condicionnan pa Aruba, kico lo bay pasa e dia ey. Tur e crisis tumando luga cu riba 500 caso activo despues di tabata na cero, tin e atencion di comunidad combina cu inval na cas di un coordinador di ex Minister Otmar Oduber y na Bestuurskantoor. Door di esey hopi hende a lubida di kico lo bay pasa awo. Tambe a lubida riba continuacion di e reunion cu Minister Marisol Lopez Tromp.
Mirando e situacionnan ariba describi, AVP ta bisa cu Aruba merece miho. Mester haci un escogencia pa deal cu e crisisnan necesario, of evita crisisnan innecesario y esaki nan ta haya cu no ta tumando luga.
Reino Hulandes, Candelaria a bisa, no ta pasando den su miho momento mirando e tension existente, cu entre otro e condicionnan inaceptabel cu tin riba mesa. E situacion ta preocupante pasobra Hulanda a bisa bon cla cu “mi ta papiando cu bo y no negociando”. E impresion ta cu kico cu Aruba bisa no ta cambia opinion di Hulanda. Y esaki ta bini na momento cu mester di dialogo.
A tuma nota cu Prome Minister Evelyn Wever Croes a bisa di a manda un contra propuesta pa Hulanda , cu kisas ta un bon paso pero nan kier sa kico e contra-proposicion ta. A pidi pa haya informacion di esaki dia 17 di juli, pero no a haya contesta. A manda un recordatorio riba e peticion aki, pero te cu diamars mainta no a haya reaccion. AVP a haci un peticion pa Gobierno bin duna un splicacion na Parlamento di cual ta e posicion cu Aruba a tuma pa loke ta condicionnan di Hulanda. Mester di e informacionnan aki pa Parlamento tambe tuma un posicion.
E fecha di 14 di augustus ta uno hopi importante ya cu Hulanda ta propone algun condicion cu ta hopi delicado pa Gobernacion di Aruba. Esaki pasobra nan kier pa e maneho di Finanza, Enseñansa, Salubridad Publico y Husticia nan kier tuma over.
Husticia ta pasando den hopi reto y ta compronde pakico Hulanda kier tuma over debi na falta di confiansa. Principalmente si mira cu Minister Bikker tabatin como su principal consehero, e sospechoso principal den caso Flamingo (esta Otmar Oduber). Candelaria ta kere cu esaki ta e motibo cu Hulanda ta prefera scucha y no negocia, “pasobra no tin e confiansa”. El a mustra riba e lantamento continuo na Guarda Nos Costa, cerando hendenan pa un tempo largo cu ta trece gastonan di vigilancia y cuminda pa e detenidonan, aumentando gastonan pa Gobierno. Brandweer tambe tin problema, pasobra e ekiponan no ta adecuado, Cuerpo Policial tin demotivacion haltisimo, etc. Tur cos den mundo di husticia cu no ta bayendo bon. P’esey tin e riesgo cu Hulanda por tuma husticia over na Aruba. A mustra e mandatario na diferente ocasion pa sinta na mesa cu tur hende prome cu tuma decision, manera a sosode cu e lease di un helicopter. Minister no por a mustra cu e ta un partner serio pa Hulanda sinta na mesa cu ne y papia entre otro riba e suma di placa cu Hulanda a pone disponibel pa e problema di ilegalnan, y cual placa a uza pa otorga proyecto na amigonan di su partido. “Mas y mas e ta bira visibel pakico Hulanda no ta den negociacion cu Aruba den area di husticia. E consecuencianan di e mal maneho no ta algo temporal, pero lo keda pa mas tempo.”
Candelaria y AVP ta kere cu mester cuminsa mustra Hulanda cu Gobierno di Aruba por ta un partner serio. Por cuminsa pa duna cuenta riba e forma di uzo di fondonan, kibra publicamente e lasonan cu personanan cu no ta integro y cu ta bou di investigacion. Y mester sinta dialoga cu Hulanda y mustra nan cu no ta convini Hulanda pa tuma husticia. Sintando y dialogando lo yega hopi leu. Pa logra tur esaki mester demostra cu tin un Gobierno cu ta digno di confiansa y apto pa tuma decisionnan dificil, cu ta pone dilanti pais prome cu partido y esey no ta tumando luga awo. Trabou tin hopi pero e tempo no t’ey,” e miembro di fraccion di AVP a bisa.
