Lider di Fraccion di MEP, Rocco Tjon, a bin dilanti bisando cu Parlamentario di Fraccion AVP, Arthur Dowers lo atac’e personalmente. E Parlamentario conoce Arthur Dowers como un persona cu no ta ataca hende y ta contento cu e Parlamentario a bisa cu e ex mandatario a nombr’e como un director.

Aunke cu e sa cu Parlamentario Tjon ta bin di famia y ta liga cu MEP, a socge pa no atac’e personalmente. Esaki ta bin pa motibo cu e Parlamentario ta kere cu manera tur otro cuidadano, lamentablemente MEP no ta haci mescos, pero tin e derecho di a solicita pa cierto posicion. Rocco Tjon por ta sigur cu e no lo atac’e personal.

“Si mi bisa bo cu mi ta kere cu bo mester haci bo trabou, ta cu constitucion ta bisa bo cu bo tin cu controla gobierno, loke gobierno ta haci. Constitucion ta stipula kico ta bo trabou, claro cu bo tin libertad pa por haci kico cu bo kier. Pero ora bo ta sinta ataca ami, bisando cu ami lo haci cierto cosnan y atacando mi colega, mester pone e cos ey straight”, asina el a indica. No ta berdad cu Fraccion di AVP a bay di acuerdo pa haci algo cu ta contra e interes di Aruba, pero tin un palabracion entre MEP tempo di Rudy Croes y Hulanda y a cumpli cu esey.

Rocco Tjon tin e derecho pa defende su partido y e Parlamentario di AVP tin e obligacion di trece e berdad afo, pero tambe pa defende integridad di hende. No por ta asina cu ta haci algo y despues ta gaña hasta den partido propio cu cos a bay diferente. E lider di fraccion MEP a manda un invitacion pa su persona pa join nan den e politica nobo. “Mi no ta interesa den politica nobo di MEP. Mi ta kere den e politica cu ami conoce. Un politica di respet pa hende, un politica di dignidad, un politica intigridad, un politica di respet pa opinion di hende”. E no ta kere den un politica cu ta ataca hende, unda ta yama nan pa tur sorto di ladron y cos malo pero despues ta brasa nan y ta forma un gobierno cu nan pa ta na poder.

Esaki ta un politica cu Parlamentario Dowers ta rechasa. E no kier forma parit di e politica nobo di MEP y ta prefera di ta den e politica cu e ta considera un politica nobo di nos tempo. E ta gradici e invitacion di Rocco Tjon y ta spera di por sigui cu debatenan di nivel cu otro y di contenido pa asina aki contribui na e mehoracion di calidad di bida di hendenan di Aruba.