Prome Minister Evelyne Wever Croes semper ta insisti cu su gobierno ta uno transparente, cu ta bisa loke e ta haci y cu lo haci loke nan ta bisa, un ponencia cu te ainda tin cu wordo demostra ainda mirando cu despues di un aña den gobernacion, su gobierno no a cumpli cu promesanan haci na pueblo.
Miembro di partido AVP, sr Melvin Tromp a señala cu e momento crucial a yega pa prome minister y su gobierno, mustra sinceridad cu su pueblo y bin dilanti y splica loke e ta bay haci pa corta miyones na gasto di personal manera CFT y gobierno di Hulanda ta exigiendo.
“Mientras cu ainda parlamento no a haya e concepto di e protocol cu prome minister y minister di finansa a firma cu Hulanda pa alarga permanencia di CFT na Aruba, ya por mira cu CFT a cuminsa actual a base di e protocol cu a wordo firma dia 22 di november ultimo y hasta ta ordena minister di finansa pa tuma decisionnan relaciona cu cambionan presupuestario di 2018.
Un carta cu ta confirma cu CFT lo defini tur loke gabinete Wever Croes por haci pa e añanan cu ta bin caminda a ordena e minister pa usa cualkier entrada incidental conoci como meevallers, pa reduci e deficit presupuestario.
No cabe duda cu gabinete Wever Croes a tuma un decision cu lo bay tin consecuencianan ainda mas pisa cu e pakete di medida cu ya a wordo impone riba pueblo y en realidad e situacion lo sigui empeora den transcurso di 2019.
No solamente gobierno no mag di usa ningun entrada adicional pa proyecto of otro asuntonan general, e acuerdo ta pone cu pa esunnan di entrada abou, ta dificil pa nan bay haya algo extra for di gobierno y aki nos ta papia di esunnan di entrada minimo, esunnan den onderstand y e pensionadonan.
Sinembargo tambe nos tin cu señala cu mientras cu tanto prome minister como minister di finansa a insisti pa algun siman caba cu nan lo no por bay di acuerdo cu Hulanda pa cuminsa kita hende for di den servicio di gobierno, tur cos ta mustra cu esaki mester bay wordo haci y cu e ta parti di e acuerdo firma cu Hulanda.
Awo aki nos tin un prome minister cu a mustra su satisfaccion cu e protocol firma, e acuerdo nobo bou di cual su gobierno lo tin cu traha a base di ordonan di CFT y e momento ta bay yega cu no ta keda gabinete Wever Croes nada otro, di manda hende cas of impone mas medida cu aumento di belastingo cu lo aumenta e inflacion den un forma nunca bisto antes.
Si prome minister a insisti semper cu su gobierno ta uno transparente, cu e hende ta central den maneho di su gobierno, nos ta kere cu e momento a yega pa e prome mandatario mustra sinceridad cu su pueblo, mas tanto cu e trahadonan publico y kico ta bay pasa cu nan.
Mientras cu ya caba a manda centenares di trahado cas pa motibo cu nan ta lo ta liga na partido AVP, awor ta surgi un situacion cu mester manda ainda mas hende cas pa por reduci e gastonan halto di persona, cu a sigui aumenta segun observacionnan di CAFT y Hulanda.
Ta dificil pa kere cu e momento aki lo no yega, esta cu lo manda hende cas cu tur consecuencia cu esaki lo tin pa cantidad di tata y mama di famia, sigur ora cu tuma nota cu ya caba CFT a cuminsa ‘ordena” gabinete Wever Croes pa cumpli cu e protocol firma dia 22 di november ultimo.
Kendenan lo wordo manda cas? Ki acuerdo lo yega cu e grupo aki pa nan bandona servicio di gobierno ya cu tur loke prome minister caba a menciona cu implementacion di un vutreglening, cu lo bay manda gran parti di esunnan den overtolligpoul cas, lo no ta suficiente pa cumpli cu exigencianan di CFT y Hulanda.
Ta di lamenta cu tin un grupo di funcionarionan publico lo lo drenta aña nobo sin cu nan sa kico ta bay pasa cu nan, ki futuro tin pa nan, anto a base di un maneho di un gobierno cu a priminti progreso y felicidad ora cu nan a drenta gobierno,” Melvin Tromp di AVP a declara.
