E eliminacion di exoneracion di BBO y BAZV pa servicionan financiero y bancario, como tambe pa seguronan comercial, tin implicacionan serio pa e clima di inversion y ta un impuesto adicional pa pueblo cu mester hasi uso di e servicionan aki. “E servicionan aki parti grandi di e entradanan di e institucionan financiero y nan lo conoce un aumento di 0% pa 6% for di 1 di juli. Si analisa e operating income di djies e banconan comercial, nos ta papiando aki di un entrada adicional di casi 10 miyon di florin pa caha di Gobierno,” Parlamentario Richard Arends di fraccion di AVP a bisa. “Cu esaki no ta tene cuenta ainda cu e otro institucionan financiero y di credito” Un biaha mas ta wordo confirma cu coalicion a aproba un ley ciegamente sin ningun conseho, sin ningun consulta y sin ningun proyeccion macro economico pa su efectonan.
E eliminacion di exoneracion aki ta conta tambe pa companian di seguro, institucionan cu ta eherce actividadnan financiero y di credito manera APFA, Volkskredietbank y FCCA. “Nan tambe lo añadi BBO y BAZV riba e servicionan cu nan ta presta na e cliente y ta obvio cu e instancianan aki lo pasa e peso pa e cliente. Esaki lo bira un impuesto adicional pa e cliente,” Sr Arends a splika.Despues cu mayoria den Parlamento a aproba e ley di ‘coalitieheffing’ — un ley cu ta regla gran parti di e suma di 130 miyon florin cu gobierno tin presupuesta pa aña 2018 na entrada pa financia su gastonan adicional di 125 miyon compara cu realisacion di 2017, como tambe un gran cantidad di cambionan fiscal — Parlamentario pa fraccion di AVP, Sr. Richard Arends a alerta Gobierno riba e implicacionan di e cambionan aki pa famianan. Sinembargo Gobierno no a duna oido na e preocupacionan cu fraccion di AVP a trece dilanti.
For di prome di juli lo cuminsa cobra BBO y BAZV riba transfer fees, credit card fees, deposit fees, closing fees, ora di lanta placa na e ATM di un otro banco y tambe ora di sera seguro di auto y di biahe. Esaki lo aumenta e ‘cost of doing business’ enormemente na Aruba y lo prehudica e competitividad di e comerciante chikito, pero tambe lo aumenta e peso riba e cliente cu ta hasi uso di servisionan. Esaki tin consecuencianan enorme pa e inversionista, e comerciante, e empresario chikito, pa e ‘young profesional’ y pa esun cu ta traha independientemente y tambe e startup. “Esey ta sin conta e cambio di nomber pa ‘BAVP’ unda ta laga politica drenta den un area cu e no ta pertenece”
E transicion pa mas impuesto indirecto sin cu tin compensacion debido pa esnan di mas vulnerabel por tin repercusion hopi pisa pa esunnan di mesun recurso Fraccion di AVP a vota contra di e ley aki, pasobra e ta un ley cu ta mishi den cartera di famianan pasobra e compensacion cu Gobierno a prominti no ta completo y tin como consecuencia cu 10.0000 pensionado ta perde nan reparatietoeslag. “Durante tratamento di e ley nos a expresa nos preocupacion cu eliminacion di exoneracionnan existente lo aumenta e costo di haci negoshi aki na Aruba,” Sr. Arends a splica.
