Lider di fraccion sr Marlon Sneek, durante conferencia di prensa, a mustra cu fraccion di AVP a dirigi dos carta, uno na oficina di VNO y otro na Gobernado, den cual ta informa cu gabinete Wever Croes, a inicia cu su “afscheid beleid.”
“Dia 30 di november Prome Minister Evelyn Wever Croes a anuncia cu campaña a cuminsa, nos a nota cu e ‘afscheid beleid’ a cuminsa ora cu nos a tuma nota cu con gobierno a cuminsa yena hende den diferente departamento.
Nos a mira esaki na Censo, nos a haya informacion cu esaki a tuma luga hasta na Banco Central, tambe na departamento di impuesto y nos por sigui menciona otro departamentonan y esaki ta algo inaceptabel.
Ta inaceptabel cu gobierno ta bay crea responsabilidad pa e siguiente gobierno y sigur mirando e pandemia cu tin, sigur mirando acuerdonan cu gobierno a firma cu Hulanda, caminda a bay di acuerdo cu Hulanda cu gobierno ta bay corta den personal y loke por mira awe, ta firma ta firma pa loke ta contractnan pa cinco aña, tumando hende den servicio permanente.
Nos ta mirando contractnan cu ta cabando di esunnan cu ta campañando cu gobierno, kendenan a bin hunto cu e Minister, awor ta haya contract di cinco aña, otronan ta haya Landsbesluit pa wordo tuma den vaste dienst, creando asina responsabilidad financiero pa e siguiente gobierno.
Pa nos esaki ta algo condenabel, sigur ora cu gobierno ta haci esaki deliberadamente, ora nos mira por ehempel Minister Dangui Oduber ta purba di defende e bagamunderia aki bisando cu e hendenan aki ta bay cu loke ta nan salario cu nan tin na su departamento.
Sinembargo aki tin cu mustra cu no ta un departamento ya cu ta e buro di e Minister y ken por garantisa Minister Dangui Oduber, cu e hendenan cu su persona a bin cu nan y tur hende por corda e lista di 5 di December di 2017, ora cu el a nombra tur e hendenan aki como cordinador, como bodyguard, cono chofer, como bode y awor e ta pone nan den departamentonan.
Nan a bin cu Minister Dangui y nan tin cu bay cu Dangui pa motibo cu e siguiente Minister lo no bay traha cu e hendenan aki, pues awor Dangui ta con un placa cu supuestamente ta den su buro, cu no ta di Dangui, cu no ta fiho ya cu cada Minister, depende con e kier traha e buro ey su gastonan lo ta menos, anto awe Dangui ta crucifica pueblo cu nan ta haya ta paga mas cu 10 hende pa motibo cu su persona a dicidi di cera e contractnan aki.
Esey ta ‘afscheid beleid’ pa fix hende y nos a mira esaki tumando luga tur caminda caba y pesey fraccion di AVP ta denuncia esaki ya cu ta imposibel cu sr Knops ta declara cu for di zomer bay ariba na luna di Mey bay ariba, Gobierno mes tin cu mira con e ta haci cu su gastonan, anto ta bira hisa e gastonan aki.
Ta imposibel y inaceptabel cu ta pueblo tin cu bay sufri pa motibo cu tin un gobierno cu ta iresponsabel y Hulanda cu ta esun cu a firma acuerdo cu nan, no ta garantisa cu nan no ta hecha baina y cu awe ta crea problema pa comunidad.
Ta esaki ta e hendenan cu ta papia di bon gobernacion, esunnan cu ta papia di transparencia y awe pueblo por mira cu ta bagamunderia ta tumando luga pa loke ta nombramento di hende, tumando hende riba contractnan di cinco aña, creando di e forma aki un ‘verplichting’ financiero pa e siguiente gobierno y nos no ta mira un reaccion den e casonan aki.
Mester corda bon cu tur decision di Conseho di Minister, tur Landsbesluit ta pasa oficina di Gobernador, pues pa fraccion di AVP ta importante pa su persona ta na altura di e tipo di maniobranan aki, pasobra sino ta bay crea mas problema pa e pais aki, sigur ora nos mira cu for di Hulanda caba e mensahe a cuminsa yega, cu nan no ta bay sigui financia FASE, onderstand, nada di e cosnan aki y cu gobierno di Aruba mes tin cu mira con e ta bay financia esakinan.
Sin duda pa fraccion di AVP e ta algo sumamente preocupante ora cu nos mira cu ni presupuesto 2021 di pais Aruba no a yega ainda Parlamento, pero gastonan den gran escala ta wordo haci di parti di gobierno, creando asina mas responsabilidad financiero pa e pais, cu na e momentonan aki no tin entradanan cu nan a conoce te cu 2019.
Pa fraccion di AVP tabata importante pa trece e preocupacion aki dilanti dor di manda carta pa VNO y Gobernador, ya cu VNO ta percura pa e Staatssecretaris di asuntonan di Reino ta na altura di e maniobranan aki cu e gobierno actual a bin ta haciendo y creando mas problema.
Nos por a scucha e discusion cu nos por a mira y e protocol cu gabinete Wever Croes a firma December di 2018, tabata pa baha gasto di personal y ta imposibel cu awe bo ta pidi tur hende pa sacrifice, gobierno ta cortando 12.5% riba salarie di ambtenaarnan, anto cu e placa aki gabinete Wever Croes ta nombrando otro hendenan.
E idea no tabata pa baha gasto di ambtenaar pa nombra otro hendenan na nan luga, no e idea tabata pa baha gasto pa e presupuesto di e pais, ta un presupuseto mas sano.
Awe nos ta mira cu tur caminda tin accion di welga tumando luga, pasobra ningun hende kier entrega mas, ya cu nan tambe ta mirando cu ta un abuso ta tumando luga.
Nan tambe ta mira cu nan tin cu entrega sea 12.5%, sea ta 5% depende di e acuerdonan cu a wordo yega na dje, anto di otro banda gobierno ta gastando placa manera cu ta sheik nan ta.
Ta imposibel cu gobierno ta exigi di e ambtenaar pa entrega 12.5% di su singreso pa aña, anto di otro banda gobierno ta usa e placa extra aki, na luga di hinca esaki pa yuda esunnan cu pa un motibo of otro no tin entrada, cu ta depende di Fase, di onderstand y comercio cu salaris subsidie, anto gobierno mes ta bira usa e placa aki pa acomoda friends and family,” Parlamentario Marlon Sneek a declara.
