Mester bin cu tur loke ta necesario pa Polisnan por tin tur medio den e cuadro legal corecto pa por haci nan trabou cu confianza, cu siguridad, pa mantene nos isla sigur. Fraccion di AVP den Parlamento no a sostene e ley aki y lo ta bon pa mustra tambe di con a tuma e decision pa no sostene, Parlamentario Robert Candelaria a splica. E motibo ta pa e hecho cu a base di su propio experencia den servicio di Cuerpo Policial, e  ley aki den temponan aya, tabatin un componente di ‘strafrecht’ cu tabata nifica cu Polisnan tabata sali sin uniform pa check e stranheronan indocumenta.

Nan tabata bay pa atende c’un proyecto den un team hunto bou direccion di un Sub Fiscal y nan tabata haci control na luganan cu tabata planea adelanta pero e accionnan aki tabata den cuadro di ‘strafrecht’, Parlamentario Robert Candelaria a sigui mustra.

“Despues a cambia e ley aki y el a haya un componente  mas ‘bestuursrechtelijk’  y e por zona awor un tiki tecnico pero den practica esaki ta nifica cu e persona cu ta kibrando e ley di LTU, no ta un sospechoso pero un hende cu no ta cumpliendo c’un ley administrativo. E diferencia aki ta trece cune basta implicacion y ley cu nos a haya pa cambia ta un ley cu mester a pasa hopi lihe pa motibo di presion cu a bin for di Hulanda riba Minister Andin Bikker.

Nos di AVP ta haya cu esaki no tabata corecto pero loke sigur no ta corecto, ta pa bo traha un ley djis pa pone un ley riba mesa, cu no ta regla tur detaye den ehecucion. Articulo 33 den e ley ta stipula kico ta e autoridad di personal di Migracion y di Polis y ta bisa cu mester tin un ‘redelijk vermoeden’  y esaki ta nifica cu “Si un Polis ta haciendo por ehempel un control di trafico y durante di e control aki e mira un hende  y pidi e hende aki pa su permiso y resulta cu e hende aki no tin su permiso cune, si e Polis detene e persona aki, e detencion aki no ta cuadra cu ley. Ta berdad cu e persona no tin un permiso pero e forma con a yega na haci e detencion no ta cuadra cu ley”, segun Candelaria a mustra.

E Parlamentario ta haya cu pa bay hinca un Polis den riesgo di haci uzo di autoridad cu e no tin, hincando e Polis den problema, atrobe pensando den practica, ta mas cu claro cu Fraccion di AVP no por a sostene e cambio di ley aki. A trece e punto aki na atencion di Minister Bikker, pero e mandatario di husticia a hustifica cu lo reevalua e ley despues di 18 luna y cu entre otro e por bin cu ‘ambtsinstructies’,  e por bin cu reglanan con pa aplica e ley den practica.

“Mi ta kere cu esey tabata e ruta corecto pa cana, esta pa regla e ley adelanta y no duna algo cu por wordo interpreta na mas cu un manera, poniendo e Polis of e ambtenaar di Migracion den riesgo. Pa e motibo aki nos fraccion no a sostene e cambio di ley aki pero e idea pa renoba e ley aki, e idea pa bin cu hermentnan nobo, den e caso aki cu Polisnan tabatin antes y pa nan haya esakinan bek, ta algo positivo y corecto pero mester haci esaki algo completo si”.

AVP ta haci un yamada na Minister di Husticia pa bin cu e ley completo, cu tur e condicionnan, e autoridad cu Polis y oficialnan di Migracion mester y ora ta cla, conta cu sosten di fraccion di AVP, pasobra ta kere cu ta necesario pa Polis y tur otro departamento concerni, tin sosten di un ley completo pa por actua”, asina Parlamentario Robert Candelaria a termina bisando.