Fraccion di AVP a tene su conferencia di prensa di tur siman na Coco Loco Bar na Eaglebeach pa motibo di inhusticia cu mester wordo denuncia, cometi pa minister di infrastructura contra di un comerciante local cual wordo denuncia y condena pa Parlamentario Arthur Dowers.
“Nos a mira algun siman pasa con a bin cu hopi forsa na e sitio aki y a kita tur e stoelnan di e persona kende ta doño di e facilidad aki y a duna orden pa basha abou un pida cushina cu e señora a traha di 2 meter cuadra, pues 2 meter riba un piso existente pa por tapa un frigidaire y un baki pa laba man.
A obliga e doño basha e pida luga aki abou y a bay cu su stoelnan pa cual e doño tin permiso pa e stoelnan aki y e propio minister a hiba campaña den prensa contra di e señora aki y su negoshi pasobra e ta haya necesario pa persigui e señora y mester wak si e por kibre.
Nan a bay cu stoelnan cu e señora tabatin permiso pa esaki den un forma brutal y despues ta manda bisa e persona aki, pa bin busca su stoelnan bek, loke ta otro prueba cla di abuso di poder,” Parlamentario Dowers a mustra.
E miembro di fraccion di AVP a sigui mustra cu e señora tabatin ‘toestemming’ di funcionarionan pero e minister no tabata na altura di esaki y despues a duna ordo pa anula parti di e derecho aki di e negociante.
El a sigui mustra cu a mira cu tin diferente otro facilidadnan riba e isla aki cu ta mucho mas grandi cu e negoshi aki na Eagle, traha sin permiso, traha riba tereno di gobierno pero aki e minister no a tuma accion y al contrario ta manda avisa DOW pa bay negocia cu e hendenan aki pa yega na soluciona esakinan.
Arthur Dowers a mustra cu su persona a puntra e minister riba e asuntonan aki durante tratamento di presupuesto 2018 di con e ta persigui e persona aki y di con e no ta persigui e persona cu a traha un proyecto ilegal y su contesta cu a ricibi for di e minister ta cu e persona cu e traha su proyecto completamente ilegal y ta conta cu su sosten y bendicion pa traha un proyecto completamente ilegal.
Riba dje Parlamentario Dowers a sigui mustra cu e minister ta haya cu DOW mester bay sinta cu e persona cu a traha un proyecto totalmente ilegal riba tereno di gobierno, pa yega na legalisa esaki y ta lanta e pregunta e ora di con den un estado di derecho con un persona cu a traha algo chikito riba un pida vloer ta wordo persigui y otro cu a traha henter un proyecto grandi ilegal, ta conta cu bendicion di minister.
Ta bisto cu esaki ta un persecucion politico y Dowers a mustra cu e direccion cu e pais ta bayendo, ta direccion di un pais dictatorial caminda nan por drenta luga di un hende coy tur cos bay cune sin cu esaki tin un base legal, y kier dicidi con doño di negoshi tin cu haci loke e minister ta dicidi.
