Si bo tuma nota di contenido den medio nan di comunicacion y tambe riba social media bo lo kere cu abuso di mucha ta algo di pasado. Bo lo kere cu Aruba a eradica e crimen monstruoso aki. Pero esey ta leu di e berdad.

Durante campaña di eleccion na 2021 hopi politico a profila nan mes riba e tema aki. Politico nan a papia di e tema, a pone riba panfleta y papia di abuso di mucho durante intrevista. Pero asina cu eleccion a pasa nos mucha nan a wordo lubida. Miyones di fondo nan publico a wordo gasta na social crisis plan sin cu nos ta wak of sinti un diferencia. Promesa di pasa ley den 6 minuut keto bai no a keda realisa. 

Pa colmo mei mei di un pandemia gobierno ta ocupa su mes cu un ley pa silencia media pero no tin tempo pa dedica na un ley contra abuso di mucho. A priminti cu den 6 minuut lo pasa ley pa proteha nos mucha nan pero a prefera usa e 6 minuut nan pa scirbi un carta pa menasa prensa cu lo pasa ley pa silencia nan si nan sigui critica e gobierno actual.

Nos mucha nan a wordo lubida door di nos gobernante nan. Sigur lo bo por argumenta cu 2021 tabata uno di hopi conflicto y cu otro reto nan manera e pandemia di covid. Pero tur argumento ta perde cualkier credibilidad ora nos tuma nota di decision nan cu gobernante nan a tuma cu tabata benificia nan mes of esnan den nan circulo familiar of circulo politico. 

Ora lider nan y autoridad nan hudicial pone interes financiero y interes politico riba interes general, inhusticia ta prevalece y esnan mas vulnerabel ta bira victima. Un ehempel di esaki ta caso di Jeffrey Eipstein, un homber rico cu hopi coneccion politico y hudicial. Epstein a haci uso di su poder financiero y influencia politico sera wowo y bocanan pa por comete su fechoria nan.

Esaki ta pone mi pensa di con na Aruba, un pais chikito, nos no por eradica abuso sexual di menor. Nos mester por dedica tur atencion y recurso pa proteha nos mucha nan di abusador nan y aplica un systema di castigo mas efectivo.

Durante e ultimo aña nan tin varios organisacion cu ta hiba e lucha contra abuso di mucho. Cuanto ayudo y sosten nan a ricibi di Gobierno? Nos no a wak ningun tipo di accion of movicion politico concreto riba e tema. E “atention span” di gobierno pa e necesidad di comunidad ta hopi cortico. 

E realidad ta cu loke nos ta balora esey nos ta cuida y dun’e atencion.  
Aruba, ki balor nos mucha nan tin? Ban pone accion y trece cambio den e situacion monstruoso aki.

Mucha nan ta importante pa Dios (Marko 10:14). Palaba di Dios ta papia di consecuencia pisa pa esnan cu comete inhusticia contra mucha (Mateo 18:6). 
No ta tempo pa nos ley nan tambe refleha e balor cu nos mucha nan tin pa nos?
Ta 6 minuut so di boso tempo nos ta pidi!