Parlamentario Jennifer Arends- Reyes ta bisa di ta orguyoso di a forma parti di e Parlamento cu a traha y aproba e ley di Ombudsman y Kinder Ombudsman. Un ley di iniciativa cu a cuminsa bou di Gobernacion di AVP y awo a aprob’e den forma unanime.
E ley aki a pasa despues di varios aña di preparacion. Como miembro di e comision special di Ombudsman y co-iniciador (hunto cu Parlamento) di e ley aki, el a splica cu tin varios paso cu mester tuma ainda pa e ley por bai den funcion.
Sra Arends-Reyes miembro di Fraccion di AVP a entrega tambe na Presidente di Parlamento den cual ta pidi pa yama un reunion estilo di “vragenuur” cu caracter di urgencia relaciona cu e desaroyonan den Enseñansa. E ta sinti cu tin hopi preocupacion tanto cerca mayornan, scolnan, cabesante y docentenan riba maneho di e pandemia na scol y pensamento di e Minister. Nan kier sa di e Minister kico tur a pone como maneho pa atende cu e pandemia aki na scolnan, ki preparacion tin den caso cu tur scol mester bai online un rato, ki presupuesto el a pone disponibel, etc.
Tambe e fraccion di AVP tin pregunta relaciona cu e reduccionnan cu e Minister a haci den su presupuesto, entre otro e maestronan pensiona cu a limita nan participacion den enseñansa despues cu nan baha cu pension. E kier sa di e vacaturanan cu mester yena y pregunta riba lesnan di landamento cu e Minister aparentemente a tuma un decision pa para esaki. Pa tur e motibonan ariba menciona, segun Arends -Reyes, nan ta spera di haya cooperacion di Presidente di Parlamento pa e vragenuur tuma luga mas lihe posibel. A pidi esaki pa motibo cu usualmente no ta contesta e preguntanan y awor kier pa e Minister bini Parlamento y contesta e preguntanan specifico.