“E Gobierno actual ta pone cu tur dia comunidad ta mas decepciona den dje, pasobra e ta un grupo di pirata. Simplemente e grupo aki a yega na otro pa saca probecho di e pais. Ningun dia nan a prepara pa goberna y ningun dia nan a bin cu un plan di kico nan ta bay haci den Gobierno”, asina Benny Sevinger, miembro di Parlamento di Partido AVP a bisa diaranson mainta para dilanti Arulex Center na Eagle.

Tin tres cos cu MEP semper tabata conoci pe y awor cu a join POR y RED cu tambe tin e mesun linea di MEP, cual ta:

1) Nombracion politico, Friends and Family, unda por mira den Bestuurskantoor cu Minister Glenbert Croes tin tur su rumannan ta traha banda di dje, un Dangui Oduber mescos y sin lubida Evelyn Wever-Croes. Tur e famia Croes y Oduber ta den Bestuurskantoor, kiermen “friends and family”, nombramento politico ta loke MEP semper ta cualifica den esey:

2) Percusion politico, unda por mira con nan ta persigui hendenan cu no ta di acuerdo, no a vota of ta sospecha di no a vota pa nan. Hasta ta persigui hendenan cu a vota pa nan tras di cortina, unda cu por mira na tur departamento di Gobierno, kioskeronan, hendenan cu ta traha banda di caminda ta keda persigui;

3) Huurmento di edificio y e parti di integridad cu nan no tin. Aworaki Prome Minister Evelyn Wever-Croes ta grita cu e ta e persona mas integro aki na Aruba, pero su pasado y historia ta mustra cu esey no ta. Tempo cu nan tabata den Gobierno, e tabata y ta doño ainda di e edificio Arulex. Parti esencial di e bureau ta den e edificio di Arulex y e tempo ey nan tabatin e edificio aki completamente na huur cu gobierno y nada no a cambia den esey.

Apenas nan a drenta den Gobierno y no tin un presupuesto cla, pero ya caba a cera un contract cu su tata pa huur e edificio pa SVb. Pero awo e ta sali bisa cu el a para esaki, pero awo e tata ta bay bisa cu a firma un contract y kibra e contract, pasobra mester duna un “opzeg termijn” y mester paga e gastonan. Placa ta bay core p’e tata y apenas nan tin un par di luna den Gobierno. Friends and family ta sigui, persecucion y nombramento di tur familiar ta sigui, huurmento di edificio a cuminsa y esaki no ta bay caba.

Dia cu un delegacion di Venezuela a yega pa papia cu Prome Minister con pa resolve e problema entre Aruba cu Venezuela, no a firma nada pasobra nan mes ta parti di e problema. Ora cu tin contrabandistanan ta saca oro di Venezuela y ta den e edificio di Arulex esaki ta tuma luga, kiermen con e Prome Minister por resolve e problema ey. Esaki ta prome biaha den historia cu Minister di Buitenlandse zaken ta bin Aruba pasa bay Venezuela pa regla e problema, di cual nan no a bay cu e Prome Minister di Aruba. Esaki ta bin pasobra e mes ta forma parti di e problema aki, asina Parlamentario Sevinger ta señala.

Partido AVP lo sigui vigila esaki for di Parlamento vigilando Gobierno y informa e comunidad di e desaster cu tin den gobernacion. “Tempo cu nos tabata den Gobierno nos Prome Minister Mike Eman a bisa wak pa boso no tin niun asunto di friends and family’”, Benny Sevinger a bisa. Ningun minister tabatin trahadonan ruman rond di nan, tampoco no tabatin edificionan na huur for di famianan manera e gobierno aki cu apenas a drenta y ya caba nan a cuminsa na e mesun practica bieu. Esaki ta un atraco legal y awo cu nan a gara Prome Minister Wever cu su man den e pochi di sucu, a dicidi trek esaki pasobra e ta Minister di integridad pero ya caba a firma e contract y e pagonan a cuminsa. Si ta bay kibra e contract, asina mes mester paga.