Diahuebs mainta durante di un conferencia di prensa di fraccion di AVP, Parlamentario Gerlien Croes a vocifera e preocupacion grandi di partido AVP, relaciona cu informacionan personal di pashentnan, ta habri awor pa publico caminda tur hende por haya e tipo di informacionnan personal aki.

“Ta bon pa mustra cu fraccion di AVP ta parando pa interes di comunidad pa motibo cu mi no a scucha di otro fraccionnan cu ta sostene gobierno, haci pregunta na gobierno manera miembronan di oposicion a haci, relaciona cu e asunto di DVG.

Tres luna pasa mi persona a haci pregunta den Parlamento relaciona cu rumornan cu tabatin fraude cometi, caminda Minister Oduber a admiti cu tin fraude cometi y e ora mas pregunta di miembronan di oposicion a cuminsa Sali.

Ta un asunto sumamente preocupante ya cu aki nos ta papia di privacidad di un ciudadano pero na mes momento ta miles of miyones di placa a wordo traha cu informacion di hende  y esey ta locual tur hende mester cuminsa realisa cu nan a usa informacion di hende, si e informacion ta valido of no, hinca esaki den un sistema y cobra hende pa esaki mientras cu tabatin un persona cu tabata administra henter e sistema aki.

DVG a confirma cu esaki no a wordo administra pa nan, a caso e ora esaki lo ta Setar y si dado caso esaki no ta Setar cu tabata responsabel pa e informacionnan aki, ta kende ta esun cu a administra tur e informacion ricibi.

Ya cu na Aruba por scucha esunnan den gobierno insisti cu mester goberna cu transparencia, a papia di integridad tambe y awor ta un bon momento pa prueba con transparente gobernantenan ta.

Tres luna pasa mi a  haci pregunta na Minister di Salubridad relaciona cu fraude comete den DVG  pa loke ta e vacunanan y minister a confirma cu tabatin un caso di fraude camidna un persona lo a  wordo suspendi.

Despues a sigui un silencio hermetico riba e hecho aki pero realidad a bin resulta cu no tabata trata di un caso, no tabata solamente un persona pero un cadena di fraude cu a tuma luga den e depaertamento di salubridad publico pa loke ta e sistema di vacunacion y lekmento di informacion medico di ciudadanonan di Aruba.”