Diaranson anochi Fundacion Mito Croes di Estudionan Social Cristian Aruba (FESCA), a ofrece na publico en general un simposio cu academico Hulandes specialisa den Union Europeo, Dr. Wessel Geursen den sala di Cas di cultura. E topico di un aliansa strategico cu Union Europeo na beneficio di Aruba ta uno cu sigur a hala atencion ya cu e evento a surpasa su capacidad.

President di FESCA, John Hart a confirma cu e anochi tabata exitoso caminda fuera di e cantidad di persona cu a asisti, tambe tabatin hopi interaccion cu e orador. “Esaki ta e di 3 simposio ku Fundacion di Estudionan Social Cristian Aruba of Fundacion Mito Croes ta realisa aña aki. For di nan a saca hopi conclusion cu a pasa pa Partido di Pueblo Arubano AVP pa integra den nan vision y programa di accion”. 

Candidato nobo di partido AVP, Stephany Sevinger, kende por cierto ta un graduado universitario den Relacionnan Exterior y conoce di e tema di ley Europeo, a atende e evento y a keda impresiona cu e participacion di publico. E ta contento di mira esaki ya cu, di su mes experiencia por bisa cu no ta un tema cu ta bin suficiente dilanti.

“Tabata sumamente informativo pa scucha con loke ta pasando na Europa ta afecta nos y kico no.” Mas aleu Sevinger a indica cu “lo ta bon pa mas Arubiano sa pasobra por ta no sa cu hopi di e leynan Europeo ta conta pa nos. Si bo ta informa di e tema, bo por sa kico bo derecho ta y kico e ta nifica pa Aruba.”

E conclusion cu candidato Wendrick Cicilia a saca ta cu, un bes mas, a keda demostra cu AVP ta e unico partido cu tin e contacto y comunicacion cu figuranan clave na Den Haag pa mehora e relacion y saca e maximo probecho pa e isla. E ta mira como obstaculo principal, e deficit democratico actual den Reino Hulandes. “Nos enfoke ta bay ta pa garantisa cu Aruba tin representacion den parlamento di Reino Hulandes,” Cicilia a bisa.