Diahuebs mainta, parlamentario di fraccion Partido di Pueblo Arubano, AVP, Mervin Wyatt-Ras tabata presente na Pasadia Bibito Pin, pa forma parti di e Open Dag di Stichting voor Verstandelijke Gehandicapten Aruba (SVGA). E ocasion tabata oportuno, no solamente pa brinda apoyo na tur cliente, nan famia y tambe personal y directiva di e institucion, pero tambe pa recorda cu, mientras tabatin tur oportunidad pa trece mehoracion, MEP y Gabinete Wever-Croes I y II a ignora e necesidad di e muchanan cu limitacion riba nos isla.
Bou di SVGA ta cay diferente centro di cuido, manera Bibito Pin, Briyo di Solo, Cas Blenchi y Man Na Obra, entre otro. Cada un ta adapta na e necesidad unico di e diferente cliente, garantisando facilidad cu ekipo, personal profesional pa cuido, pero tambe formacion pa desaroyo personal y miho integracion den comunidad. Un trabou sumamente bunita, cu mester apoya, segun e parlamentario a indica.
Partido AVP semper a boga fuertemente pa e segmento aki di nos comunidad. Wyatt-Ras hunto cu lider di fraccion, Mike Eman a entrega na Parlamento di Aruba, dos aña pasa, un concepto di cambio di ley pa ahusta e ley di bijstand. Cu esaki lo a habri caminda pa otorga e mayor di un muchanan cu limitacion, un bijstand cu por yuda nan cubri e diferente gasto adicional cu tin mara na nan cuido.
Articulo 8A, di e concepto presenta ta bisa cu: Minister por otorga na e cabes di famia cu tin un mucha den cas cu ainda no a cumpli 16 aña, un ‘kindergehandicaptenuitkering’ si ta keda demostra cu e mucha tin algun tipo di limitacion. Fuera di esey, AVP a haci su huiswerk indicando kico e ta representa pa caha di Pais Aruba. Tin rond di 400 famia cu por bin na remarca pa un suma total di 4.6 miyon florin pa aña.
Wyatt-Ras: “Nos ta lamenta pasobra nos a entrega e concepto aki dia 3 di september 2021 y no a tende nada mas. A haci diferente pregunta na minister, manda carta di rappel. Despues hasta a entrega un presupuesto alternativo pa cuminsa paga esaki.” Sinembargo Gabinete Wever-Croes I y II a haci loke nan ta haci miho, ignora e necesidad di pueblo cu excuus cu ta trahando riba dje.
Mientrastanto, e tres aña aki tabata tempo cu hopi mucha por a haya un ayudo pa contribui na un miho calidad di bida. Pero e egoismo di MEP no a permiti duna AVP un logro, maske esey a bay na sacrificio di e muchanan cu limitacion. Si bo no ta den e situacion aki, ta dificil pa contempla, pero un mucha cu limitacion fisico y/of mental ta nifica placa cu ta sali pa, entre otro, diagnostico, remedi, terapia, dieet special, ekipo of adaptacion di cas, etc.
Mas reciente Minister Rocco Tjon a indica cu e introduccion di un bijstand pa mucha cu limitacion lo cay bou di Landspakket. Kier men ta algo cu nisikiera nos gobierno mes a propone, pero cu Hulanda awo ta pusha. “Si MEP a kere cu ta un fabor nan ta kita di haci AVP, ta e pueblo so no ta afecta atrobe, pasobra e proposicion ta basa riba combersacion cu mayor y lidernan cu ta atende cu e muchanan aki,” e parlamentario a comenta.
En todo caso no ta manera pa Gabinete Wever-Croes atende cu fraccion di Parlamento cu ta e entidad maximo y di control, pero sigur no ta manera pa Gabinete Wever Croes y MEP atende cu e muchanan cu limitacion, nan mayor, famia y tur den e red di cuido. Mas aleu, gobierno ta den un disputa legal cu SVGA pa e pago debido di e fondonan cu nan mester.
Pa AVP si esaki ta un prioridad grandi y ta forma parti di su vision pa un maneho cu lo bolter tur situacion inhusto na Aruba un bes cu pueblo duna nos e mandato y tuma bek e rienda di e pais. For di AVP si mayornan lo haya e sosten pa cumpli cu tur necesidad y desaroyo, pasobra nan tin derecho igual cu nos tur. Wyatt-Ras a termina felicitando tur esunnan cu ta labora den facilidadnan di SVGA y e mayornan di mucha cu limitacion pa e bon trabou.
