For di momento cu nos a anuncia nos punto di programa cu nos lo aumenta e pensioen di nos grandinan cu 50% nos a scucha un variacion di contra argumento di gobierno y hasta di algun den oposicion. Supuestamente lo a duna “hopi aumento caba” of “placa lo no ta crece riba mata” ta reaccionan di e campo di gobierno y hasta di colega den oposicion cu ta opone e punto di AVP. Esaki ta locual mr. Mike Eman por a tuma nota den prensa cu e ta refuta un vez mas.
“Ta imposibel pa pensionadonan biba dignamente cu e entrada di pensioen actual. E pensioen mester aumenta considerablemente y e reparatietoeslag cu AVP a introduci ta e verhiculo con lo percura pa esaki den un gobernación di AVP, asina mr. Mike Eman a expresa. E cifranan ta confirma cu pensionadonan tin deficit grandi tur luna. Tambe Eman ta splica e con lo percura pa e aumento di 50%. Eman ta mustra riba cifranan cu ta indica cu tur e medidanan di Gabinete Wever-Croes awor na 2024 gobierno tin 500 miyon mas di entrada anualmente cu Gabinete Eman tabata tin na 2017. Y pueblo no ta wak unda e 500 miyon aki ta bai. Pesey Eman ta convenci cu e spacio financiero tey pa juda e pensionadonan por medio di un aumento substancial di e reparatietoeslag cu pensionadonan ta haya desde cu Gabinete Mike Eman I y II a introducie.
PENSIONADO DEN POBRESA Y ABANDONO
Eman ta bisa cu e cifranan ta papia pa nan mes. Tanto e pensionado soltero como pareha ta core cu un deficit grandi tur luna. E pensioen actual no ta suficiente pa cubri e costo di bida.
Nos tata, mama, abuelo, abuela ta biba den pobresa y abandono. Eman ta mustra cu segun SVB per 1 di mei 2024 tin 22.304 pensionado na Aruba. E situacion ta hopi penoso tambe pa esnan cu salarionan bao di 3500 florin. Pesey, miles tin dos trabao. Esaki ta afecta tanto nan salud fisico como nan bienestar social.
GOBIERNO TA RESPONSABEL PA SIGURA BESTAANSZEKERHEID PA NOS GRANDINAN
Gobierno tin un responsabilidad fundamental pa garantisa cu nos grandinan tin un entrada suficiente pa un bida digno. Segun un dicho popular Arubiano: “E cuido di nos grandinan ta e piedra fundamental di nos comunidad”. Eman ta subraya cu mester di un compromiso serio pa atende e necesidadnan basico di nos grandinan. Nan a cuida nos, awor ta na nos pa cuida nan. Manera Salmo 71:9 ta corda nos: No me deseches en el tiempo de la vejez; Cuando mi fuerza se acabare, no me desampares. “No laga mi den ora di mi biehez; ora mi forza no tey mas no desamparami”.
AVP KIER AUMENTO SUBSTANCIAL DI PENSIOEN PA NOS GRANDINAN
E lider di oposicion, mr. Mike Eman ta conclui bisando cu e situacion cu Gabinete Wever Croes a crea aki ta causa di un pobresa feroz y inacceptabel pa nos grandinan. AVP a bin ta pidi un aumento substancial di pensioen pa nos grandinan. Durante tratamento di Presupuesto 2022 y 2023, AVP a presenta mocionnan y prespuestonan alternativa pa logra e aumentonan necesario pa trece un alivio pa nos grandinan. Sinembargo, e coalicion di gobierno a vota contra, ignorando e necesidad urgente di nos pensionadonan. Pesey e aumento di 50% ta un punto primordial di AVP pa e siguiente gobernacion, tambe pa duna nos grandinan nan remedi bek. Ta ora pa bolter cos pa pone e BON COMUN nos dilanti.
