Fundacion Mito Croes y fraccion di AVP ta orguyoso di por organisa un symposio masha importante cu e tema. “Cooperacion strategico Aruba-Hulanda 2.0” E symposio lo tuma lugar diahuebs awor 25 di April den Grazia Room di Marriott Courtyard Aruba y lo cuminsa pa 7’or di anochi.
E prome director di TNO Aruba sr. Jan Ebbing, lo ta na Aruba y lo ta e orador principal na e ocasion special aki cu ta asina importante pa Aruba. E symposio tin como meta pa pone e vision optimista y progresivo riba cooperacion strategico entre Aruba y Hulanda riba agenda politico atrobe. E “2.0” den e nomber ta referi na e periodo exitoso di cooperacion entre Aruba y Hulanda entre 2009 y 2017 bou liderazgo di ex Prome Minister di Aruba, sr. Mike Eman.
Presidente di Fundacion Mito Croes, sr. John Hart, a referi na y accentua e perspectiva prometedor di e periodo bou maneho di Prome Minister Mike Eman bisando: “Den e periodo ey a logra hopi den e relacion entre Aruba y Hulanda, entre otro cu atraccion di companianan y institutonan Hulandes di renombre mundial manera TNO, Rietveld Academie, Scheepvaartschool Rotterdam, Philips y Gas Unie. Hasta a logra institui un facultad nobo na Universidad di Aruba den cooperasion cu Universidad di Leuven, Belgica, cu ta completamente dedica na sostenebilidad.”
Hart ta sigui bisa: “Lamentabelmente e esfuerzonan aki a mengua despues di e periodo di Prome Minister Mike Eman y casi tur e institutonan Hulandes a bandona Aruba. Como organo di conseho scientifico, Fundacion Mito Croes kier sostene partido AVP pa cuminsa pone di awor caba e base pa re-activa y fortifica e vision aki, pa ora di asumi responsabilidad pa goberna nos pais, por tuma accion mes ora.”
E esfuerzonan di Prome Minister Mike Eman e tempo aya a wordo traduci den un protocol di cooperacion cu Hulanda ya na oktober 2011. Minister di relacionnan den Reino mr. Piet Hein Donner a informa Tweede Kamer di Hulanda e tempo ey di e vision proactivo di Aruba bisando entre otro: “Hulanda ta dispuesto pa sera relacionnan di cooperacion mas estrecho cu tur e paisnan den Reino. Aruba ta wak posibilidad pa formanan di cooperacion strategico cu Hulanda y cu Union Europeo cu por duna un contribucion essencial na realisacion di e ambicionnan di Aruba y cu por forma cu balor adicional importante pa loke Aruba kier logra riba propio forsa.”
Durante di e symposion e accento lo ta riba identificacion di pasonan concreto cu lo mester tuma pa reactiva e cooperacion entre Aruba y Hulanda, pa asina logra metanan pa ambos pais y pa Reino Hulandes den su totalidad. Un talento hoben di Fundacion Mito Croes, sr. Aad Jan de Gruijl, lo papia di e oportunidadnan nobo pa empresarionan hoben cu FinTech. Sr. Mike Eman lo clausura e symposio cu observacionnan analytico riba e tema di e symposio, a base di su experiencia y conocemento, y lo conta con e ta wak cu esakinan por contribui na e iniciativa di 2.0. Tambe sr. Eman lo pone atencion na e necesidad di converti e debe di 900 miyon florin di e fiansa di Hulanda durante di e periodo di Covid, den un fondo di inversion pa sostenebilidad di Aruba.
“Un futuro nobo no ta wordo crea den un par di luna, sigur no si tin mas partido envolvi. Tog ta bunita pa wak, cu ora e partidonan ta desea esaki, por logra resultadonan concreto lihe, manera den e caso di Aruba. Esaki ta priminti hopi pa futuro.” Asina minister Piet Hein Donner a scirbi den su carta na Tweede Kamer na 2011.
E symposio aki ta un oportunidad unico pa esnan interesa tanto na Aruba como na Hulanda, pa bini hunto, pa intercambia ideanan y pa discuti riba pasonan concreto cu por tuma pa fortifica e cooperacion strategico entre e dos paisnan.
Fundacion Mito Croes
Fraccion di AVP
Aruba, 21 April 2024
