Sentimientonan, preocupacionnan y deseonan cu a worde recohi den Pueblo ta forma e fuente di 10 punto importante cu AVP ta pone como areanan cu un siguiente gobernacion lo mester bai enfoca riba dje pa trece alivio y prosperidad bek pa pueblo. Asina e lider di AVP, mr. Mike Eman a enfatisa den conferencia di Prensa hunto cu coleganan hoben y profesional Wendrick Cicilia y Presidente di e hala scientifico, Fundacion Mito Croes, John Hart.
10 PUNTO DI PRIORIDAD PA PUEBLO
1.Trece alivio rapidamente pa Pueblo; Controla Costo di Bida y formalisa, den cooperacion cu Hulanda un institucion cu ta monitoria e realidad socio-economico di nos Pueblo.
2. Mehora poder di compra; Economia husto caminda un salario di un trabao mester por ta suficiente pa un bida husto y di calidad; Prosperidad comparti;
3. Reduci costo pa haci negoshi y promove inversion y comercio pa crea mas y mihor cupo di trabao;
4. Duna Pueblo nan remedinan bek y acceso rapido na specialista y cuido medico completo!
5. Pa famia por yega na tereno y construi nan vivienda propio lo haya alto prioridad; lo elimina condicionnan inhusto.
6. Aumento substancial di Pensioen di nos Grandinan, sosten special pa nos grandinan y esnan vulnerabel den comunidad y esnan cu un limitacion;
7. Yega na acuerdo cu Hulanda pa converti debe di 900 miyon den un fondo di inversion pa Aruba; Inversion den Educacion; Infrastructura pa vivienda; Renovacion di barionan; Creacion di areanan di deporte y recreo; Conecta Aruba technologicamente y digitalmente (FinTech) na e mihor plataformanan den mundo.
8. Young entrepreneurs mester haya acceso na FinTech pa por desaroya comercio digital local y internacional;
9. Renovacion di bario y centronan di ciudad y creacion di atraccionan di recreo y deporte;
10. Haci Aruba un Isla sigur y tranquilo atrobe; Calidad di bida husto cu porvenir y perspectiva pa nos hendenan y pa nos imigrantenan, un Aruba pa un y tur.
PREPARA PA
BOLTER COS
Lider di Partido mr. Mike Eman, Wendrick Cicilia y John Hart a splica con AVP semper a traha a base di un plan scientificamente y profesionalmente desaroya y cu esey ta locual ta tumando lugar awor. E puntonan cu Eman a presenta a worde comparti cu e hala scientifico di e partido berde y esaki na su turno lo sigui desaroya e puntonan aki den un dialogo cu partido y stakeholdernan den comunidad. Enfasis ta riba un Plan y un Team Profesional pa saca Aruba padilanti “the day after Evelyne Wever Croes”. Aruba a perde 8 anja na man di e gobernacion di medida y ta ora pa bolter cos pa trece bek un gobierno cu ta pone e BON COMUN padilanti, ta e enfasis di e dirigentenan di partido berde.
