Den e dianan aki e lider di fraccion di AVP, mr. Mike Eman y un delegacion di e partido y di institutonan scientifico cu ta asesora e partido ta sosteniendo momentonan di refleccion profundo cu gremionan y institutonan den nos comunidad.

E tema central den e encuentronan aki, mr. Mike Eman, ta splica ta cu mester delinea un caminda pa Aruba pa realisa un reconeccion di economía, gobernación, política y nos sociedad cu e bon común, ‘the common good’. Eman ta splica cu e vision aki ta bai na e curason di locual ta haci nos humano y ta condicionan necesario pa trece felicidad bek pa nos comunidad. 

UN FARO BANDONA

Awor nos a para bira manera riba un barco den un lama devastador buscando un luz di un faro cu a worde bandona. Nos valornan comun ta manera un faro bandona, cu ta laga comunidad sin guía den scuridad. De nos mundo occidental y profundamente na Aruba a surgi un desconeccion, un distanciamento di e fundamentonan riba cual un sociedad humano feliz mester ta basa. Nos modelonan economico a distancia na mes di e bon comun, enfasis ta worde poni riba cifranan cu no ta refleha e realidad berdadero den comunidad. Blinda pa esaki ta ignora e berdadero necesidad cu tin den nos sociedad, Eman ta bisa. 

UN RAIS DENUTRI

E matanan di nos tempo ta biniendo abou pa falta di tin raisnan sano fuerte pa tene nan firme den e suelonan di nos Pais. Nos tin cu reconoce cu crecemento economico abstrai di un parti grandi pueblo y medidanan feroz a denutri raisnan di kico tabata e troncon di nos sociedad. Ya mas no tin un mata cu ta florece y ta trece oportunidad husto pa un y tur. Un economía mester ta diseña pa mehora e bienestar di tur ciudadano, no únicamente di algun. Esey kiermen crea cuponan di trabao cu salarionan husto, garantisa acceso na servicionan esencial, manera salud, educación, y reduci e desigualdad den comunidad.

E LUZ DI GUA Y UN TRONCON PA SOCIEDAD

BON COMUN – COMMON GOOD

Nos mester di un cambio de paradigma; un reconeccion cu e ‘common good’. Un cambio di un enfoque cu na e momentonan  aki ta centra riba e ‘mi’ y e ‘previlegiadonan’ envez di ta enfoca riba e ‘nos’ cu ta enfoca riba e bon común. 

Eman ta bisa cu “política mester tin como objetivo crea estandardnan social y ambiental cu ta respeta comunidad y nos planeta. Nos sistema di gobernación mester worde re-conecta na nos comunidad, na pueblo, na tur gremio, den dialogonan social, den plataformanan manera “town hall” meetings y encuentronan regular canando den bario, manera antes, caminda ta scucha pueblo y traha pa e bon comun. 

Den e encuentronan aki cu gremionan y institutonan, mr. Mike Eman, ta enfatisa nos no unicamente kier rediseña sistemanan y modelonan economico y poltico, sino tambe redescubri un causa comun pa sirbi e bon comun. E ta un yamada pa restaura nos  inspiracion y significación pa revitaliza e alma di nos sociedad. “Nos ta aspira un salida di solo pa un dia nobo cu lo restaura e coneccion cu e bon comun; un amanecer yen di promesa y posibilidadnan nobo”.