Ex lider di partido MEP y ex Prome Minister di pais Aruba, Nelson Orlando Oduber, a dicidi di bay participa den e campaña electoral di su partido, dor di pretende di ta politico mas limpi y nunca a haci malo contra di su pais’
E miembro di partido AVP, sr Juni Croes ta mustra cu realidad di bida ta e hecho cu Nel no tin nada di papia y tin cu stop di pretende y admiti e desaster cu su gabinete di cuater gobierno a laga e pais aden.
“Ta increibel con Nel ta kere cu ora cu el a bandona gobernacion di e pais na 2009, cu el a bay laga e pais den bon condicion, cu tur cos su gobierno di ocho aña a drecha y a laga caha di gobierno den bon situacion.
Kisas ta su edad pero e ex lider di MEP aki a laga un pais atras den desesperacion caminda e unico logra cu su persona por papia di dje, ta cu HENTER su famia, di ruman pa primo, di campañadonan te cu sostenedonan di partido, a wordo bon recompensa pero e pais mes a keda na werki, den mal estado.
Te hasta awor na grandi, no kier reconoce e daño cu el a haci na e pais aki caminda e gran parti di e debe cu e ta papia di dje, a bira necesario pa e forma con el a habraca e pais aki lagando un destruccion nunca bisto atras.
Nel bo no ta corda con bo gobierno a laga e fondo di pensioen na werki, lagando esaki na rand di bancarota, lagando cantidad di scol rond Aruba den mal condicion, caminda plafond tabata cay riba maestronan y nan alumnonan.
A costa miyones cu partido AVP di Mike Eman mester a hinca pa scapa e fondo aki y sigura futuro di miles di pensionado pero awe Nel ta pretende di no ta corda y di no sa di nada.
Lanta ariba Nel, purba corda con gobierno di AVP mester a busca placa pa drecha scolnan, haciendo inversionnan di casi 60 miyon pa drecha esakinan, lagando esunnan di menos entrada den un situacion hopi dificil cu a pone cu mester a introduci rapidamente e “reparatietoeslag” pa yuda e hendenan aki.
Spierta Nel, laga bon memoria funciona un tiki, ya cu pa ocho aña gobierno a ‘vries” indexering di trahadonan publico, cual tambe gobierno di AVP mester a regla pa asina trahadonan publico recupera nan derecho riba indexering.
Ta di unda Nel a saca curashi di papia di proyectonan di PPP, caminda a su gobierno ta esun cu a inicia cu e sistema aki pa cumpli cu algun proyecto cu te awe ainda Aruba ta pagando pa nan.
Berguensa total Nel mester tin, ya cu den gobiernonan di Evelyn Wever Croes el a funciona como consehero y nos ta duda cu el a haci esaki por nada mientras cu awe Nel ta cobrando como miembro di Raad van Commisaris’ di tanto Setar y WEB y awor kier papia di debe?
Tene honor na bo mes Nel, yuda pueblo si ainda bo tin un tiki di consenshi y pidi bo partido bandona gobierno, habri caminda pa pueblo por haya solucion ya cu na Hulanda nan no kier tende di e lider di MEP actual pa motibo cu mescos cu bo persona, “gañamento ta boso talento,” miembro di AVP, Juni Croes ta mustra.
