Cuido di nos barionan y sosten pa nos hendenan semper ta unda e curason di AVP ta. Caring pa chikito y grandi por tin un bon ambiente den nan ta bida ta Importante pa tur hogar y bario. Poniendo e common good, e bon comun di Aruba nos dilanti como strea di guia ta rekeri vision, planificacion, pero tambe accionnan alternativa cu ta haci e vision aki concreto y tangible den tur bario y cas na Aruba. “Pesey nos ta trece e balor aki, esta di haci loke ta bon pa henter nos comunidad, mas serca di nos pueblo y comparti e compromiso y sentimento aki den forma concreto cu Pueblo”. Asina e lider di AVP, mr. Mike Eman, a expresa splicando e accion grandi cu AVP y Plataforma Hobennan Profesional (PHP) di partido AVP lo organisa hunto cu y pa e Pueblo di Dakota y Tarabana dia 2 y 3 di September awor.

COMMON GOOD IN

YOUR NEIGBOURHOOD

Riba e dianan di e accion grandi aki voluntarionan di e bario y di rond Aruba lo bini  cu truck y pick-upnan pa pasa recohe saconan di sushi na practicamente tur caya di Dakota y Tarabana dianan 2 y 3 di september. Un siman promer e voluntarionan di e accion “Common Good in Your Neigbourhood” lo pasa laga saconan di sushi na mas tanto adres posibel pa e casnan ta prepara pa entrega nan desperdicio na e truck y pick-upnan cu lo pasa pa recohe esakinan. E iniciativa ta conta tambe cu apoyo di hopi compania di bakinan grandi di sushi cu lo worde aloca riba sitionan strategico pa por ricibi e saconan di sushi. Lo tin tambe posibilidad pa entrega articulonan mas grandi cu no ta usa mas, manera frigidair, stoof, cama, etc. na trucnan specifico cu lo pasa pa recohe esakinan. Tambe lo por entrega autonan biew na e ploeg cu lo concentra riba desperdicio di hero. E meta ta pa juda nos comunidad tene nan becindario, nan cura y Aruba limpi manera nan ta desea.

GREEN VIBE

E ALTERNATIVA BERDE

Den nomber di PHP, e hoben profesional Wendrick Cicilia, tambe ta haci un yamada na hobennan pa participa na e GREEN VIBE aki. “E ta un forma con nos ta mustra con e alternativa berde ta pensa y sinti y con pa care pa nos dushi isla”, Wendrick Cicilia ta accentua. Wendrick ta hopi posito cu mescos cu na e “Think Common Good beach Clean-Up“ cu PHP y AVP a organisa aña pasa, cu lo sinti atrobe un green vibe postivo pa juda duna un man como bon prohimo pa e common good yega den tur nos barionan. 

E accion lo sali for di Plaza John Wowo riba Diasabra 2 di September 9’or mainta rumbo pa e cayanan den e bario di Dakota y Diadomingo 3 di September lo sali 10’or mainta for di dialnti di Pius X School rumbo pa e cayanan den e bario di Tarabana. Representantenan di Dakota y becindario, Artur Dowers, Marlon Sneek y Clifford Heyliger, lider di partido Mike Eman y otro motornan grandi tras di e accion aki, Netto Zara y Adeline Olivieira, ta enfatisa cu durante di e bishita den bario lo scucha tambe kico ta e preocupacionan y deseonan di habitantenan di Dakota y Tarabana. Cu “Bo Bario” durante Gabinete Mike Eman a yega di mustra con pa duna atencion na nos barionan. Awor nos barionan cu ta den abandono total, lo experiencia e GREEN VIBE y e sentimiento di e alternativa humano cu Aruba tin mester pa por respira un aire di atencion y progreso atrobe.