“Antes den minanan di carbon mineronan ta drenta den e tunelnan cu un canarie gel pa duna nan indicacion si tin peliger di carbon monoxido den e mina.  Si tabata tin gasnan peligroso den e mina, e gasnan aki ta causa morto di e canaria promer cu e mineronan. Proporcionando asina un advertencia pa mineronan sali imeddiatamente for di e mina. E promer siñalnan di caida di cantidad di pasaheronan riba KLM y turismo for di Hulanda por ta un siñal asina di advertencia cu nos tin cu tene cune”, e lider di oposicion mr. Mike Eman a duna di conoce den prensa.

CIFRANAN CU POR TA

UN ADVERTENCIA

Eman ta splica cu den siman e a emiti un relato expresando preocupacion cu KLM ta baha su capacidad di asiento pa Aruba. “Mi a mustra cu no ta promer vez cu KLM ta sirbi como “barometer” di kico futuro di turismo di Aruba lo trece”. E lider di fraccion di AVP ta lamenta cu  Minister Ursel Arends, encarga cu “airlift”, no tabata na haltura di e desaroyo aki y Minister di Turismo, Dangui Oduber, a purba di contradici e preocupacion aki cu referencia na cifranan di turismo for di Merca. Pa e motibo aki e lider oposicion a presenta awe na prensa prueba di e cifranan cu e ta mira como e “canarie gel”, pero den e caso aki e betrouwbare “blauwe vogel” den e tunelnan di turismo cu ta duna ya siñal di advertencia. Eman a presenta cifranan di caida di pasahero di KLM y caida di turistanan procedente di Hulanda. 

E CIFRANNAN DI CAIDA

TA PAPIA PA NAN MES

E cifranan cu Eman a presenta ta mustra cu e cantidad di pasahero riba KLM a cai for di 18.648 te cu Mei na 2022 pa 15.294 te cu Mei 2023. Esaki ta un caida di no menos cu 18%. E pruebanan ta mustra tambe cu e cifranan di Hulanda ta mustra un caida aun mas grandi. Di 21.036 turista te cu Mei 2022 e cantidad a cai te cu 16.339 na Mei 2023. Esaki ta un caida di 22.3%. “Aki nos claramente ta hayando un siñal di advertencia di e “bauwe vogel” cu ta dunando Aruba un “heads-up” cu “something is going wrong”, Eman ta envatisa. Ora un aerolinea asina prestigioso manera KLM cuminsa duna indicacion cu tin un reduccion di demanda pa Aruba tur alarmanan mester ta riba “rood”, segun e lider di oposicion.

GABINETE WEVER CROER

TA IRESPONSABEL

E motibo cu Eman ta concidera e situacion aki hopi grave ta pasobra cu Gabinete Wever Croes a opta pa haci Aruba hopi mas caro cu tur su medidanan, manera redoblacion di BBO, aumento dramatico di accijnzen riba bebida, aumento di roomtax cu mas di 30%, aumento di airport tax y awor e BBO di 7% na frotera, pero no a haci ningun investigacion di kico esaki ta nifica pa e posicion di competencia di Aruba den turismo. Eman ta bisa cu bow di e condicionnan aki lo bo a spera cu Gabinete Wever Croes lo ta hopi alerta y ta monotaria e cifranan di serca y lo a capta e “alarma” di caida di bishitantenan di Hulanda como un advertencia. Eman ta bisa cu e mercado di Hulanda ta mas sensitivo pa aumentonan di prijs. Hulandesnan ta scerpi pa haya “waar voor hun geld” y ta e promer mercado cu ta laga bo sa si bo ta birando mucho caro. “Pesey mi no por caba di compronde cu no ta accepta e situacion grave aki di un caida di 22% for di Hulanda como un advertencia pa henter nos desaroyo turistico”, Eman ta bisa. E ta mustra cu esaki por ta un advertencia ta bira mas contundente ora mira cu en general e ocupacion di Aruba a cai cu 6.3% te cu Mei 2023. “Esey ta un indicacion general, no di Huland so”, mr. Mike Eman ta envatisa.