Seramento di John Wesley College lo por tin consecuencianan serio pa calidad di enseñansa. No solamente na San Nicolas, pero tambe pa enseñansa riba henter Aruba. Pasobra John Wesley College (JWC) ta un scol conoci pa bon enseñansa cu a hunga un rol importante den bida di hopi hoben y pa hopi aña na San Nicolas. No lo ta facil pa remplasa e scol aki si sere. Seramento di JWC lo limita e posibilidadnan pa studiantenan na San Nicolas y lo por tin como consecuencia cu e ta pone mas presion riba otro scolnan, haci klasnan den otro scolnan mas grandi, exigi mas di nan recursonan limita, cu na su turno lo por tin influencia negativo riba maestronan y studiantenan. “Esaki ta loke nos ta bisa den nos documento pa tene JWC habri. Den paisnan rond di mundo nos a wak e fenomeno aki sosode, pasobra e recursonan, scolnan, maestronan y finansas ta keda limta si no cambia e maneho. Y e ta pio ainda pa un area di nos isla cu ya ta masha limita den tur cos, menos stimacion pa nos pais. No tin niun parti di nos pais cu a wordo neglisha pa tanto aña door di e gobiernonan di e signatura di MEP, manera San Nicolas y vecindario”. Asina Mike de Meza di partido AVP a splica pakico e seramento di JWC ta asina malo pa enseñansa y pa San Nicolas.

SEÑAL ROBEZ

Seramento di JWC ta manda un señal robez pa studiantenan, maestronan y majornan tocante di e balor di enseñansa. Specialmente den un tempo cu ya ta dificil pa tene hende y hobennan motiva y cu speransa pa futuro. Mike de Meza:“Den e documento cu nos a entrega cu argumentonan pa tene JWC habri y haci pa haci bon uso di e scol y e maestronan, nos ta menciona tambe e punto ey. Esta cu seramento di e scol ta manda un señal robez pa studiantenan. E studiantenan cu ya ta vulnerabel, lo por pensa cu nan comunidad no ta haya nan enseñansa importante y pesey ta sera e scol. Esaki lo por tin efecto negativo riba nan estudio. Nos sa cuanto majornan y maestronan ya tin cu haci pa tene nan studiantenan motiva. Sera e scol lo haci e situacion aki pio.” 

SAN NICOLAS Y VECINDARIO

San Nicolas y vecindario ya pa mucho aña ta wordo confronta cu un serie di problema economico y social. Enbez di tuma iniciativa pa stimula un desaroyo positivo pa henter e area di San Nicolas y vecindario, ta dicidi di sera un scol conoci manera JWC. Mike de Meza: “Esaki ta otro sla pa e area aki y e ta limita e capacidad di San Nicolas y vecindario pa usa enseñansa como un instrumento pa promove desaroyo. E ta kibra e speransa pa un miho futuro ainda mas. Bo sa ki efecto negativo edificionan sera y scolnan sera tin riba hende y riba e speransa pa cos drecha? Den e documento cu nos a entrega na gobierno nos ta menciona e efectonan negativo di loke nan ta yama e “broken window effect”. Nos ta mustra cu estudionan haci den paisnan rond di mundo ta mustra cu edificionan y scolnan sera por contribui na mas inseguridad y criminalidad, pasobra e ta stimula un comportacion anti-social y ta kibra e sentido di pertenece na comunidad sano. Ta net door di inverti den enseñansa gobierno lo por contribui na revitalisa e comunidad y promove un sentido di seguridad, speransa pa un miho futuro y cu e hendenan ta pertenece na un comunidad cu ta traha na mehora e comunidad.”

Mike de Meza ta sigui mustra riba e argumentonan cu nan a pone den e documento pa tene JWC habri. Mike de Meza: “For di dia cu a sera e refeneria San Nicolas y vecindario a hay’e confronta cu retonan economico, social y di infrastructura grandi. E seramento di un scol ta empeora e situacion aki pasobra e ta haci e revitalisacion mas dificil y ta kibra e moral di e comunidad di San Nicolas. Si inverti den San Nicolas gobierno lo manda un señal positivo cu e ta kere y ta actua pa lanta San Nicolas atrobe. E mes un señal aki lo tin un efecto positivo pa henter nos pais cu tambe mester di inversion y stimulacion pa lanta cabez atrobe. Si tene JWC habri gobierno ta contribui na transforma San Nicolas, atrae mas inversion, cu lo crea mas oportunidad pa e siguiente generacionnan. AVP si ta kere den tene e scol habri y cuminsa un proceso di renoba San Nicolas y vecindario.”