“No tin motibo pa sera John Wesley College na San Nicolas”. Esey ta e opinion di Conny Connor-Aventurin, maestro di scol profesional, cabesante di scol y candidato riba lista di partido AVP. Conny a splica su punto di bista profesional den e programa di partido AVP di diasabra mainta na Canal 90. Despues di e programa e y otro candidatonan di partido AVP a haya hopi reaccion di mayornan y maestronan di scol cu a expresa nan gratitud cu e sugerencia cu e maestro di scol aki a duna y e motibonan pa no sera e scol di MAVO aki na San Nicolas.
PLACA PA SCOL
E motibo cu gobierno a usa pa sera e scol ta cu e cantidad di alumno na e scol a baha. Conny su reaccion riba esaki ta cu esey no ta straño si Bo wak cu e scol ta cobra 700 florin pa alumno pa aña pa por bay scol. Anto esey ta sin conta loke tin cu paga pa uniform y material pa scol. “Ken por paga asina hopi placa pa un solo mucha bay scol awendia? Ta claro cu majornan ta busca otro scol cu ta cobra hopi menos pa nan jiunan.” Pa Conny Connor-Aventurin y hopi mayor y maestro esaki ta e motibo principal cu e cantidad di alumno na e scol aki a baha. Anto e ora e posibel solucion lo por ta pa baha e suma cu ta cobra pa “schoolgeld” door di subi e subsidio di gobierno pa scolnan rond di Aruba. Specialmente pa un bon scol manera John Wesley College. Conny Connor-Aventurin: “Si gobierno ta bisa cu nos economia ta bay asina bon y nos ta wak cu ta bolbe haya hopi placa di Hulanda, pone e placa ey den enseñansa y baha e suma di “schoolgeld”. Esey lo ta un bon inversion manera a haci bou gobierno di AVP.”
USA E SCOL PA MEHORA CALIDAD
Esnan cu ta defende e desicion di gobierno pa sera e scol ta bisa cu e cantidad di alumno a baha pasobra e cantidad di mucha cu ta nace na Aruba a baha y e cantidad di hende cu ta manda nan muchanan scol na San Nicolas tambe a baha. Conny su contesta riba esaki ta: “Hasta si e cantidad di alumno ta bahando pa motibo cu e cantidad di mucha na Aruba ta baha y e cantidad di alumno na San Nicolas ta baha, no tin motibo pa sera e scol. Al contrario. Esaki ta e oportunidad pa haci loke pa masha hopi aña ta boga pe. Esta pa baha e cantidad di alumno cu mester tin den un clas, haci e clasnan mas chikito, usa e scol di John Wesley College pa e extra clasnan cu lo tin mester y asina yuda mehora e calidad di enseñansa.” En berdad ta hopi aña caba cu maestronan di scol, sindicato SIMAR y expertonan di enseñansa ta boga pa baha e cantidad di mucha den un clas. Esey ta haci posibel pa e maestronan duna mas atencion na e alumnonan cu mester di mas sosten den clas, pasobra e maestro tin menos alumno pa atende cun’e. E ta habri mas posibilidad pa diferencia y individualisa e enseñansa na cada alumno. Esaki ta rekeri un organisacion y cooperasion di tur directiva di scol, scol y ministerio di enseñansa. Pero esey no por stroba e mehoracion di enseñansa cu por logra cu e sugerencia aki. Ban wak si minister di enseñansa, Departamento di Enseñansa, directivanan di scol y scolnan por traha hunto pa tene John Wesley College habri y us’e den forma concreto pa mehora enseñansa. Anto e no ta costa mas cu e ta costa awor aki!
