Fraccionan di MEP-RAIZ den Parlamento atrobe ta purba juda gobierno sconde e berdad tras di un otro pakete di medida y pa no laga e bos di pueblo resona. Esey ta bisto den e manera cu a yama un reunion porta cera, solamente entre comision financiero economico cu gremio pa diabierna mainta. Den e formato ey no ta duna publico oportrunidad di scucha e argumento di diferente asociacionan. Asina e lider di oposicion, mr. Mike Eman a expresa.
Esaki ta a pesar cu, for di luna pasa, AVP a haci un peticion pa bin cu un reunion habri (Openbare Bijeenkomst) riba e tema di BBO na frontera pa laga gremio y sector trece nan punto dilanti. Eman: “E motibo di haci un reunion porta cera pa publico ta pa sigui purba sconde e berdad. Gañamento atrobe. Pueblo mes mester por scucha den un reunion publico con devastador e ley aki lo ta.”
Mr. Mike Eman ta yega na e conclusion cu gobierno no ta dunando atencion na e gravedad di e situacion cu Aruba ta aden. Conseho di Raad van Advies den 20 punto ta papia con e BBO aki lo afecta e costo di bida, prijs di tur loke consumidor ta adkiri, e clima di inversion, costo di haci negoshi pasobra tin cu fia placa pa paga e BBO adelanta y turismo pasobra hotelnan lo pensa dos biaha prome cu haci remodelacion si mester bay paga pa tur material y mueble cu nan importa.
“Gobierno no ta realisa kico e ta haciendo,” asina e lider di AVP a expresa. “Gobierno kier bulldoze e ley aki y AVP a pidi pa henter pueblo scucha kico gremio tin di bisa y asina tur hende sa con e lo afecta nan tambe. Fraccion di AVP tin basta tempo caba ta alerta pa concecuencia di e BBO di 7% na fronter riba tur e BBO caba cu pueblo ta pagando. Eman ta convenci cu Gabinete Wever-Croes ta atende tur asunto di nos pais di e mesun manera: sin wak consecuencia. Ta djis wak cuanto placa nan por trece aden, sin pensa riba e impacto cu lo tin riba pobresa, ensenjanza, calidad di bida, nos grandinan y nos hobennan.
Otro ehempel di e maneho destructivo aki ta e impasse cu tin cu SABA y con ta afectando e personal di enfermeria y nos grandinan. Mescos a kita di SKOA y obliga e scolnan hisa schoolgeld, paga e werksternan menos y hasta tin scol cu mester cera, manera ta e caso di John Wesley College. “Si bo mira, tur e conflictonan cu gobierno tin cu sindicato y comercio ta bin door di e actitud ey,” Eman a splica.
E lider di oposicion, mr. Mike Eman a priminti di lo keda bataya pasobra no lo permiti pa Gabinete Wever-Croes sigui perhudica Aruba di e forma aki y mañan lo habri reunion cu punto di ordo.
