Lider di Fracion di AVP den Parlamento, mr. Mike Eman a hasi entrega di un recordatorio na presidente di Parlamento di Aruba encuanto e peticion pa un Reunion Publico tocante e subida alarmante di costo di bida pa nos cuidadanonan. E ta conoci cu prijs pa necesidadnan basico a aumento bao maneho di Gabinete Wever-Croes. E gasto nan di utilidad a auemento cu 23% mientras cu gasto di gasolin ta conoce aumento continuamente. Aditionalmente Gabinete Wever-Croes a castiga nos comunidad cu un aumento di impuesto cu a percura cu prijs nan di servicio y productonan ta bira hopi mas caro y impagabel pa nos cuidadanonan. Ademas a wordo anuncia cu lo aumenta schoolgeld cu ta causando hopi  precupacion den nos hogarnan.

Lider di Fracion AVP mr. Mike Eman ta splica cu “; schoolgeld lo conoce un aumento precupante schoolgeld pa Kleuterschool lo aumenta di 175 pa  200 florin, Basisschool lo aumenta di 175  pa 275 florin  y schoolgeld di alumnonan di Mavo lo aumento di 250 pa 350 florin. Un famia cu tres yui lo confornta na mes cu un aumento di 600 florin na gasto di schoolgeld aditional causando un precupacion financiero grandi den nos comunidad”

Lider di Fracion di AVP, mr. Mike Eman a expresa e urgencia di e situacion “nos comunidad tin hopi dificultad pa tin un sobrevivencia husto, ta for di Augustus di aña pasa nos a hasi un apelacion pa convoca un Reunion Publico pa den Parlamento di Aruba nos por atende cu e precupacion urgente di nos comunidad cu ta e aumento dramatico di costo di bida”

E ta lamentabel cu presidente di Parlamento di Aruba NO duna prioridad na atende cu e dolornan eminente den nos comunidad. Presidente di Parlemento kisas riba instrucion di Gabinete Wever-Croes ta duna prioridad na tur otro  tema  menos na e sufrimento di nos comunidad. Fracion di AVP ta sigui insisti pa convoca un Reunion Publico pa asina Gabinete Wever-Croes por bin responsabilisa su mes na Parlamento di Aruba encuanto su maneho di medida.

Lider di Fracion di AVP, mr. Mike Eman a subraya cu na varios oportunidad Fracion di AVP a subraya e ausencia di un maneho di alivio, cu ta contene con ta bay mitiga e efecto nan di e aumentonan dramatico aki pa nos comunidad. Fracion di AVP a intenta pa cambia e rumbo di Gabinete Wever-Croes na varios ocasion. Na april 2022 durante e proceso di tratamento di lei di presupuesto 2022 Fracion di AVP a entrega un Amienda den cual ta mustra cu por re-aloca e fondonan pa alivia esnan cu tine mas difisil den nos comunidad. Cu e Amienda proponi pa Fracion di AVP lo a evita cu lo a corta den cuido medico  y lo a evita cu awe esnan enfermo mester paga pa remedi. E Amienda lo duna tambe un alivio pa esnan cu ta corba bijstand y lo introduci un bijstand special pa hobenan bou di 16 aña cu tin un limitacion cognitivo of fisico. Lastimamente Parlamentarionan cu ta sostene coalicion MEP-RAIZ a vota contra e Amienda di Fracion di AVP. 

Na December durante tratamento di lei di aumento di BBO, un biaha mas Fracion di AVP a mustra Gabinete Wever-Croes ariba e consecuencianan devastador pa nos hogarnan aki na Aruba. Conforme cifra na di CBS mas cu 50 000 cuidadano ta biba abao di locual ta necesario pa sobrevivi y mas medida lo alimenta e pobresa den nos Pais. Fracion di AVP a propone un amienda pa intenta pa cambia e maneho di Gabinete Wever- Croes, pero lastimamente no a haya e sosten. Nos comunidad ta indigna cu mientras cu Gabinete Wever-Croes ta continua cu su maneho di enrikece y faborece esnan cu ta na famia y amistad, e comunidad aki ta sufri.

Lider di Fracion di AVP, mr. Mike Eman ta hasi un apelacion urgente pa yama e reunion publico pa asina por debati ariba e aumento continuo di costo di bida cu tin nos cuidadanonan sofoca. Fracion di AVP a demostra  den oposicion pero tambe den gobernacion (reparatietoeslag, schoolkindertoeslag, aumento di bijstand etc)  , cu si bo tin curason pa e comunidad bo por trece alivio pa e comunidad. E ta posibel pa para e desaroyo negativo actual y cambia e rumbo di nos Pais. Lider di Fracion di AVP , mr Mike Eman a clausura bisando: “Si bo ta sirbi e bon comun y tin e boluntad e ta posibel pa brinda e comunidad e alivio cu na ta anhela”