“Ningun sector ta scapa for di e racha di medida den pakete di Gabinete Wever Croes pa 2023. Locual nos ta wak ta cu finalmente tur medidanan aki lo termina afectando e pueblo, e consumidor y e empleado”, asina e lider di fraccion di AVP, mr. Mike Eman a splica relaciona cu cambionan den impuesto pa hotelnan y empresanan.
Eman ta splica cu den e pakete di medida tin cosnan grave, manera aumento di BBO cu ta toca pueblo direct, pero tin hopi tambe cu ta asina abusivo y abrupto pa comercio, cu no por spera otro cu nan lo pasa esaki tambe sea pa e consumidor of nan empleado cu lo worde bisa cu “gobierno a pluma e empresa y e empresa tin cu corta den salario y beneficio di trahador”.
E lider di oposicion, mr. Mike Eman, ta splica cu AVP como unico partido a alerta pa e Landspakket y su concecuencianan pa e pueblo. Den coro tur otro partido a canta den eleccion cu Landspakket ta bon, awe nos ta biba cu e amargo realidad.
Eman ta mustra cu Raad van Advies tambe ta yega na e conclusion cu tur e medidanan cu lo worde imponi riba comercio lo finalisa riba tayo di e pueblo consumidor y trahador. Raad van Advies ta bisa literalmente: “Naast de huidige inflatie, zullen ook de voorgestelde belastingmaatregelen leiden leiden tot hogere consumentenprijzen. Niet alleen de stijging van de BBO zal, indien mogelijk worden doorberekend aan de afnemer/consument, ondernemers zullen zo mogelijk ook de overige kostenverhogende belastingmaatregelen (al dan niet gedeeltelijk) doorbrekenen”.
Mr. Mike Eman ta alerta cu ta mira cu e medidanan cu ta worde aplica contra di comercio y e industria turistico sigur lo tin nan repercusion pa e consumidor, pero probablemente tambe e empleado. “Nos ta premira y preocupa cu un comercio cu cai den preta ora cu e no por pasa tur cos den nan prijs – den caso di hotel den prijs di kamber y den caso di comercio general den prijs di producto – e ora nan lo yega na e punto cu ta bisa empleado cu gobierno a laga nan “plan bari” y nan tin cu corta den salario.
“Nos ta pasando bario pa bario pa splica comunidad kico tur ta spera nos pueblo. Banda di e aumento barbaro caba di prijsnan ta bin aserca awor e aumento di tarifa di awa, coriente, gas, gasolin y pago pa remedi. Riba tur esaki ta bin awor e pakete di medida cu ta worde introduci entrante 2023. Tambe na Cas di Partido, den e plataforma “Talking Politics”, nos a bin tur siman ta informa nos miembronan riba tur e medidanan aki.
Eman ta bisa cu Fraccion di AVP a solicita tambe pa scucha gremionan den un reunion publico, pero e fraccion di MEP/RAIZ y Presidente di Parlamento no kier yama e reunion of kier reuni tras di portanan sera. Eman ta bisa cu pueblo ta scuchando ta scuchando nos, pero ta importante pa pueblo scucha e gremionan tambe cu ta representa miles di empleado y e sector comercial cu ta bai worde severamente afecta.
