Un paar di dia atras Parlamento a pasa e presupuesto 2023 cu ta pronostica di produci un surplus di 63 mion florin. Diferente minister y parlamentario di coalicion a sali ta gaba y ta celebra loke nan ta considera un gran logra. Pueblo tambe kier celebra cu nan pero no por. Pasobra e gran logro di surplus ta inclui mas medida pa pueblo. Mas medida pa un pueblo humilde cu ya no por carga mas. Un pueblo cu a aspira, lucha y traha duro pa por logra un nivel di bida digno. 

Desde 2017, ora cu MEP cu su extension nan a forma gobierno, ta medida tras di medida contra e pueblo. A campaña cu no lo tuma medida contra pueblo pa drecha loke nan tabata signala como malo. Segun MEP, nan tabata tin suficiente expertisio pa resolve problema nan di Aruba. Awel 5 aña despues pueblo claramente ta wak, cu nan unico experticio ta crea medida tras di medida. 

Hasta CaFT cu normalmente ta propone na Gobierno pa tuma medida a yega na e conclusion cu loke nan ta haci ta dimas. CaFT den su recomendacion ta bisa cu gobierno ta busca su solucion nan mucho hopi den medida contra pueblo. “De noodzakelijke lastenverlagingenworden onvoeldoende opgepakt en dekking wordt te veel gevonden ion het verhogen van de belastingen en incidentele dekkingen.“

E gobierno actual y esun anterior y tur Partido politico excepto AVP tabata pro pakete di medida cu minister president Evelyn Wever-Croes a firma cu Hulanda. Den e pakete ta incui un systema di BTW cu supuestamente tabata un reforma necesario. Awe kiko nos ta wak cu gobernante nan a scohe pa subi impuesto di BBO ainda mas. Nada di reforma pero si un medida mas contra pueblo pa asina e politico na por haya mas placa den caha pa asina e fiesta di friends and family por sigui.

Mi tabata scucha cu asombro con minister Geoffrey Wever tabata defende e subida di 1% di BBO. Minister Wever a bisa cu e 1% di subida lo tin un impacto minimal di 1.2% riba inflacion. Minister Wever argumentando den su defensa pro subida di BBO a bisa cu e ta traha cu facts (hechos). 

Permitimi comparti un par di facts cu Minster Geoffrey anto:

• Facts ta cu cu subida di BBO ta un medida
• Facts ta cu cu 1.2% di inflacion causa pa subida di BBO ta bin ariba e 8-10% di inflacion cu ta anticipa
• Facts ta cu gobierno a strika mas placa na BBO pa motibo di subi di prijs comustibel y gasoline.
• Facts ta cu gobierno ta crea mas departamento den temporada di crisis y keto bai ta kita placa di empleado publico y pensionado 
• Facts ta cu gobierno ta sigui jena e aparato gobernamental cu hende y ta kere niun hende ta ripara paso nan ta contrata nan cu un dienstverlening overeenkomst (DVO)
• Facts ta cu nos tin problema nan social serio y ta sigui cu recorte den Respaldo y otro area nan di cuido social
• Facts ta cu a corta den servicio na comunidad pero no ta baha gasto nan di goederen en diensten
• Facts ta cu e medida nan tuma den AZV ta afectando nos grandi nan y esnan di menos recurso
• Facts ta cu pueblo y comercio ta pagando un prijs halto pa awa y coriente pa motibo di metemento di politca den maneho diario di compania di Utilidad.

Esaki nan ta e facts y realidad cu nos pueblo pasando door di dje. Un Aruba caminda awe na aña 2022 hopi famia ta pasando momentonan hopi dificil. Prijs di gasoline halto, Prijs di gasoline halto, comustibel ta casi impagabel y cuentanan exorbitanta di awa cu coriente ta hasi cu hopi famia no ta logra ni paga nan cuenta ni resta pa come.

Raiz a profila su mes como un partido diferente pero te ainda despues di un aña pueblo no a nota ningun diferencia.