Na momento cu pueblo a haya su recibo di awa y coriente luna cu a pasa, por bisa cu e recibonan aki, no ta gaña ya cu nan ta mustra e realidad di prijs di awa y coriente na Aruba. Parlamentario pa fraccion di AVP, Ryçond Santos do Nascimento a mustra cu e prijsnan aki tambe tin su impacto directo riba tur otro aspecto di bida di ciudadanonan: “E ta un realidad di bida y esaki no tabata algo cu nos mester a pasa dor di dje. Esaki ta resultado di mal maneho y locual Pueblo por a mira di parti di Minister Glenbert Croes, como mandatario di MEP y di e gobierno actual, ta simplemente un desaster.

Locual tur hende por a mira ta nepotismo. Pueblo por a mira con un gobierno kier a kita hende for di trabou pa pone ‘friends and family’ den puestonan clave. Ora cu e hendenan di confiansa di  gobierno ta den e posicionnan clave, nan ta domina e companianan estatal. Tur hende por mira cu ta un maneho politisa.

Esey ta e realidad cu pueblo di Aruba ta bibando na e momentonan aki. Loke pueblo a haya pa mira ta por ehempel, un partido MEP cu a campaña cu e no lo ‘hedge’ y pa e decision y motibo ey, na aña 2022, a obliga WEB di absorba tur sla di costonan di energia. Esey a pone e compania na peliger pero e problema di mas grandi a bira cu dado momento WEB no por a wanta esaki mas y resultado di e maneho aki, Pueblo ta mira den su cartera cu cobransa di awa y coriente.

Esey ta e realidad anto awor WEB ta emiti un comunicado di prensa cu ta bisa cu ta hedge pa proteha contra posibel aumento di prijs di combustibel y pa limita perdida pa aña 2022. Pero tin cu señala aki, cu  aña 2022 a bay laga nos caba. E perdida tabat’ey caba y e perdida ta na miyones. Anto kende ta paga pa e perdida aki? Abo, nos Pueblo. E ciudadano ta paga pa e perdida aki. Ken ta sufri esaki? E ciudadano ta sufri esaki y mientras tanto nos por wak un maneho cu no ta sorprende ningun hende: Ora cu wak Glenbert Croes, ora cu wak e trayectorio  di e minister aki, e meneer aki desde inicio di su carera como politico a hinca friends and family den politica. Desde comienso di su carera politico e tabata den dealnan straño. Por wak den rapportnan di Algemene Rekenkamer. Nan ta mustra con el a maneha y ora cu check den historia, tin cu wak di unda e dicho di e postema a Sali. Di con esaki a bin?

Ora cu a wak un minister cu a haya un sentencia pa motibo cu el a viola e ley di comptabilidad,  esey ta Glenbert Croes. Anto awe locual nos ta wak ta un minister cu ta perdiendo caso tras di caso den Corte pa motibo cu ta viola leynan, ta viola derecho, pasobra e not a worry cu base legal. Anto pa e motibonan ey, Pueblo por mira un desaster unda cu e meneer aki ta hinca su man.

Na final di dia e cosnan aki ta costa placa. Si nos mira por ehempel e ayudo di FASE, cu riba su mes tabata un ayudo pa e ciudadano cu nos tur a para su tras. Pero ora fraude ta tuma luga cu FASE, pa motibo cu e minister aki ta comete mesun erornan cu e tin 20 aña ta haci caba, esaki ta algo cu nos no por carga mas. No por sigui di e forma aki mas y tog pueblo por wak cu tin un minister cu no ta siña su lesnan.

Sinembargo e  parti mas malo ta cu tin un Minister President cu tabatin e cartera, cu Glenbert tin awe, anto ta e Minister President a set up henter e maneho energetico aki. Pues Evelyn Wever Croes no por laba man tampoco di locual ta sosodiendo. Mescos cu e no por laba man pa loke a pasa na Arubahuis. Mescos cu e no por laba man pa tur e desasternan cu a bin ta pasando den gabinetenan Wever Croes I y II. Pakico? Pasobra a haci demasiado propaganda cu integridad, a haci mercadeo cu integridad, manera por mira potret bunita di Bureau Integriteit riba facebook, masha bunita, pero na final di dia e profesionalismo den e aparato gubernamental  no a bin.

Inversionnan den e aparato, pa hisa e calidad di gobernacion na Aruba, no a bin. Mescos cu inversion pa mas transparencia den Parlamento, no tey. Nos di AVP a pidi reunionnan publico pero e coneccion entre Parlamento y gobierno actual ta asina estrecho, cu ta gobierno ta dicta si nos ta haya un Reunion Publico, Openbare Bijeenkomst of un Commissie-vergadering. Ta na Cocolishi ta wordo dicidi si e reunionnan aki por wordo yama of no”, Parlamentario Ryçond Santos do Nascimento a trece dilanti den conferencia di prensa.