“Ora baha salario di funcionarionan di WEB, ELMAR y SETAR por baha e tarifa di companianan di utilidad. Esey tabata e mensahe di Evelyne Wever Croes Diadomingo anochi den un discurso nacional pa bende e reduccion di salario di entre otro empleadonan di e companianan estatal. Ni 24 ora despues cu a pasa e ley di normering topinkomens di EWC tarifa di awa a worde aumenta cu mas di 40% pa esnan di menos recurso ! E berdad ta alcansando tur e mentiranan di Evelyne Wever Croes”, esaki ta e promer reaccion di e lider di oposicion, mr. Mike Eman riba e aumento absurdo di awa cu lo bai na vigor 1 di juli !
Otro mentira di Evelyne Wever Croes cu tambe a keda desenmascara ta locual ta spera esnan cu ta traha na e companianan y institutonan aki. Eman ta bisa cu Evelyne Wever Croes ta keda riba e mentira cu e norminkomen lo no tin efecto pa e trahadornan en general. Pero sindicatonan ya ta tendiendo for di gerencia di companianan cu CAO-nan planea cu aumento salarial lo no por keda realisa mas ! Hasta WEB a anuncia cu ya caba a vries salario di empleadonan. Esaki ta e comienso, pasobra no a hedge pa sigura contra di aumento di Fuel-Oil. “Nos ta teme pa e trahadornan cu vriesmento aki cu e ley di LNT lo ta permanente awor”, e lider di AVP mr. Mike Eman a expresa.
“Nos a cita den Parlamento for di documentonan di e ley con Evelyne Wever Croes su gobierno mes a contesta cu ta intencion di gobierno pa e efecto di LNT trickle-down den henter e structura di salario di e companianan y institutonan publico y semi publico. Pero cu un cara di palo Evelyne Wever Croes a nenga. Ata aki un vez mas locual nan mes a contesta. Mr. Mike Eman ta cita locual Gabinete Wever Croes mes ta bisa: “De normering van de topsalaris binnen de verschillende entiteiten zal mijn inziens uiteindelijk WEL moeten leiden tot een herziening van de totale loonstructuren in die ondernemingen”. Evelyne Wever Croes ta admiti, den papelnan cu pueblo no ta mira, cu si e ta su intencion pa e ley aki afecta henter e structura di salario di tur cu ta cai bao di dje y den Parlamento ta keda para riba un mentira. E berdad aki den e documentacionnan tambe a aclansa su mentira.
Tur e mentiranan di Evelyne Wever Croes ta worde alcansa pa e berdad, pero lamentablemente hopi vez ya e danjo ta haci. Pero nos lo keda divulga, denuncia y bringa e inhusticianan aki te ora Aruba worde libra di e meniranan y abusonan aki di Gabinete Wever Croes y nos lo keda lucha te ora nos por libera Aruba for di e sufrimento aki y pone nos Pais riba un rumbo di principionan di Bon Comun cu lo mester trece bek felicidad den tur hogar na Aruba, e lider di oposicion mr. Mike Eman a finalisa bisando.
