“Desde e momento cu nos a mira den presupuesto 2022 cu Gabinete Wever-Croes ta bai cobra “loon-subsidie” bek di empresanan cu supuestamente a haya di mas nos a alerta pa e forma con ta bai haci esaki”, e lider di fraccion di AVP mr. Mike Eman a expresa cu hopi preocupacion.

Nos a mira den presentacionnan di Gabinete Wever-Croes ta bai cobra bek, pa medio di SVB, mas di 80 miyon florin for di empresanan mediano y chikito. Segun Gabinete Wever-Croes mas di 1800 empresa inhustamente a haya mas “loon-subsidie” cu nan tabata tin derecho riba dje.  

Mr. Mike Eman ta bisa cu e momento cu Gabinete Wever Croes a anucia e cobramento bek aki nos a expresa cu nos ta teme cu hopi negoshi na Aruba no ta prepara pa por bai sobrebibi sin “loon-subsidie” corda bai paga bek e sumanan cu Gabinete Wever-Croes ta menciona, anto den un termino di dos anja, 

Den Parlamento Gabinete Wever Croes a bin anuncia durante tratamento di e ley di “loon-subsidie” cu lo bai na cobra e empresanan aki, pasobra segun calculacion cu a haci via departamento di impuesto e empresanan aki a haya demasiado salaris subsidie. Eman ta bisa cu a alerta cu mester atende e asunto aki cu hopi cautela, pasobra negoshinan ta hopi fragiel na e momentonan aki. 

“Nos a hasta referi na locual a pasa na Hulanda, con un proceso asina di cobra majornan bek sumanan di “kindertoeslag” cu supuestamente nan lo a haya dimas of no tabata tin derecho riba dje a desemboca den un proceso hopi inhusto den cual miles di famia a bira victima. For di esaki a sali un rapport devastador bao di e titulo “Ongekend Onrecht”. Un inhusticia nunca bisto, tabata e conclusion di e investigacion parlamentario, ta locual a worde cometi contra miles di famia inocente”. 

Awe tin un situacion alarmante, “ongekend onrecht” ta tumando lugar cu negoshinan chikito y mediano cu un cobramento feroz cu ta bai desemboca cu negoshinan mester bati bancarota pa motibo di e forma con Gabinete Wever-Croes awor kier cobra loon-subsidie bek. Nos ta tende di sumanan entre 50.000 florin te cu 350.000 florin cu ta cobrando empresanan chiquito y mediano, e lider di fraccion di AVP, mr. Mike Eman a enfatisa. A haci campanja cu FASE y “Loon-Subsidie” y awor ta bati na porta di tur hende pa paga bek. “Ongekend Onrecht”, ta bira amargo realidad awor na Aruba. Gabinete Wever-Croes no kier realisa cuanto nan a perhudica y chica e pueblo caba, e lider di fraccion di AVP, mr. Mike Eman ta finalisa bisando