Den un articulo miembro di Parlamento pa MEP, sr Berlis a ataca e persona cu ta den tur sentido e contraste total di e gobierno di MEP/RAIZ: Mike Eman. Pero ela sali ta blaf sin busca informacion. Awor cu tur su trocemento di realidad, ela para pa kens y su rol tristo di defende su gobierno incapaz cuesta loke cuesta, a keda demostra atrobe. Permitimi corigi sr. Berlis y splik’e con Mike Eman y nos di AVP a goberna y compar’e cu loke MEP ta haciendo cu nos pais atrobe.
CRISIS DI 2009
Ta parse cu sr Berlis y su “amonan politico” kier lubida con MEP a laga Aruba na 2009. Laga mi duna un discripcion cortico di e situacion na 2009: desempleo a subi te na 12% o sea mas cu 7000 trahado, mama y tatanan di famia sin trabou of entrada! Economia a cay cu 13%! Henter Caribe y mundo a pasa den e crisis financiero mundial, pero na Aruba so e economia a cay asina hopi! Dicon? Gobierno di MEP a crea un situacion economico, financiero y social cu a casi destrui nos pais! Empresanan a sera na cantidad y turismo a cay. E refineria a sera. KLM a stop di bula pa Aruba pa falta di confiansa y un di e companianan di crusero grandi a stop di bin Aruba. Trahadonan publico a wordo nenga nan compensacion husto pa 7 aña largo! Fondonan di pensioen no por a cubri e pensioen di mas cu 20 mil pensionado y nan famianan mas! Costo di bida a subi cu mas cu 12% door di medidanan di MEP. Scolnan, edificionan di gobierno, centro di ciudad tabata den condicion di decadencia. Hasta e edificio caminda e gobierno mes tabata sinta, e bestuurskantoor, a bira un ruina completo! Si esey no ta un crisis sr. Berlis, ta kico si ta?
MEGA INVERSION
Ora un pais den e un crisis asina amplio y asina grave, manera despues di un guera, ta un solucion pa lanta cabez so tin: inverti pa crea trabou, crea entrada nobo y duna Pueblo e speransa di un miho bida. Esey ta exactamente loke Mike Eman y AVP hunto cu Pueblo a haci. Pasobra contrario na e forma cu MEP ta goberna awe atrobe, Mike Eman a goberna den dialogo continuo cu gremionan. Mike Eman a inverti den mehora entrada di nos hendenan, den nan condicionnan di bida y crea instrumentonan social y economico nobo pa Aruba sali di e crisis y para riba su propio pianan atrobe! Acaso e reduccion di desempleo di 13% pa 5% no a yuda Pueblo haya entrada fiho atrobe? E introduccion di e “reparatietoeslag” y e “schoolkinderen toeslag” cu ta placa cu ta bay directo den cartera di trahadornan y di famianan, no a yuda Pueblo? Acaso e 12.5% cu MEP ta kita di salario di trahadonan si ta yuda Pueblo? E inversionnan cu Mike Eman y AVP a haci den drecha 18 bario, traha canchanan di deporte y facilidadnan publico (MFA nan) rond di Aruba, no a yuda crea trabou pa companianan local y yuda Pueblo biba miho? E inversion den y restructuracion di fondonan di pensioen di mas cu 20 mil pensionado, pa sigura nan y nan famia nan entradamensual, no a yuda Pueblo? Compara esey cu e 12.5% cu MEP ta kita di trahadornan? Esey si ta yuda? Esey tabata “crea debe” of “inverti den nos hendenan”? E inversionnan cu Mike Eman y AVP a haci den drecha y traha mas cu 40 scol, hopi cu tabata den decadencia o completamente sera (!) no tabata na interes di nos muchanan y nos pais? Compara esey cu e forma cu sra. Evelyna Wever-Croes a gaña maestronan di scol bez tras bez y den cinco aña no a haci net net nada pa enseñansa! E inversionnan cu AVP a haci pa crea un hospital nobo despues di mas cu 40 aña, mehoracion di servicionan medico pa tur hende, fortificacion di AZV no tabata pa mehora cuido medico? Econstruccion di un waf nobo despues di mas cu 60 aña, construccion di Watty Vos Boulevard y Green Corridor, no acrea un miho infrastructura cu ta sirbi Pueblo y pone economia di nos pais crece atrobe? Economia a crece y sali di e abismo cu e tabata aden! Djis puntra empresarionan. Compara esey cu e falta total di inversion di Bo partido MEP pa cinco aña caba! Semper MEP tin un excusa pakico no por. Y semper sin splica pakico miyones di placa di Pueblo si ta bay pa “friends and family”! E inversionnan cu Mike Eman y AVP a haci den energia renovabel tabata pa spaar mas cu 300 miyon florin cu nos ta gasta tur aña pa cumpra fuel, pa tene e prijs di energia mas stabiel y pa cuida medio ambiente. Con Bo ta splica Pueblo sr Berlis, cu Bo partido y Minister Presidente Evelyna Wever-Croes a para tur e proyectonan pa transicion pa 100% energia renovabel, gasta mas cu 1.6 biyon (1.6 000.000.000) florin den LNG, sabiendo cu LNG tambe ta sushi y e prijs di energia cu LNG lo sigui subi pa Pueblo pa 20 aña mas? Awe Aruba ta mas leu di e meta di 100% energia renovabel cu nunca! Danki na Abo y gobierno di MEP!
Sr. Berlis, cu ki cara Bo por defende e politica di “cangrew golos” di Bo prome minister y Bo partido cu ta destrui economia, salubridad, costo di bida, enseñansa y futuro di nos pais atrobe? Cu ki cara Bo ta tribi di troce e berdad di gobernacion di Mike Eman y AVP cu si a INVERTI den Pueblo y Pais y a saca nos pais di e crisis cu MEP a empeora? Compara esey cu e MEDIDANAN, PREVILEGIONAN Y ABUSONAN di poder di Bo partido, cuminsando cu e 12.5% cu Boso a ranca for di Pueblo y ta sigui gaña riba dje!
