E siman cu a pasa, Secretario di Estado pa relacionnan di Reino Hulandes, sra. Alexandra van Huffelen, a invita un grupo selecta di hobennan di Caribe Hulandes biba na Hulanda pa topa na cede di Ministerio di Interior y Asuntonan di Reino na Den Haag. Meta di e invitacion tabata pa combersa y siña conoce e islana den Caribe, incluyendo Aruba, for di punto di bista di esnan cu conoce, a nace den caribe y ta bibando na e momentonan aki na Hulanda sea permanentemente of pa entre otro nan estudio profesional.
Mandy Villasmil, cu ta finalisando su estudio como dokter tabata un di e invitadonan di sra. Van Huffelen, hunto cu entre otro Jandino Asporaat (Corsou), Tanja Fraai (Corsou) y Lisandro Suriel (St. Maarten).
E encuentro tabata uno informal y a combersa extenso riba Aruba y e otro islanan den caribe. A combersa tocante e retonan cu e islanan den Reino Hulandes ta pasando aden. Di su banda Mandy a duna sra. Van Huffelen un splicacion amplio di Aruba, Aruba su cualidadnan, su hendenan y tambe e esfuersonan cu e isla a haci den, entre otro, sostenibilidad energetico. Otro topiconan cu a papia di nan ta retonan manera ‘brain-drain’ y tambe e falta di profesionalnan medico na Aruba.
Banda di esey cada representante di nan respectivo isla a haya un chens pa combersa despues informalmente cu e otro y e Secretario di Estado. Sra. van Huffelen tabata masha contento di por a haya un introduccion di e islanan for di punto di bista di e hobennan prome cu e bula direccion pa e islanan e siman aki.
Mandy Villasmil, cu ta participando den maart na e eleccionnan pa gemeenteraad na Den Haag, a splica cu e ta haya, “tremendo cu un Secretario di Estado ta saca tempo di su agenda sumamente druk pa por papia cu nos pa asina e por haya un miho bista di e islanan y nan peculiaridadnan. Mi ta spera cu nos input a duna sra. Van Huffelen sufieciente informacion pa e por duna, ente otro, Aruba e cooperacion y sosten cu tin mester den e temponan dificil aki.”
Mandy Villasmil ta participa na e eleccionnan na Den Haag como candidato #8 riba lista di CDA maart proximo.
