Aruba y e pueblo Arubiano ta bay cera un aa c’un entimento sumamente grandi di desapunto ya cu ta hopi cu a participa cu cierto expectativanan den e proces electoral y awe por mira cu hopi di e promesanan cu a wordo haci durante di eleccion, un tras di e otro ta resulta di ta un engaño. Parlamentario y lider di AVP, sr Mike Eman a mustra cu comunidad, esunnan cu a entrega 12.6% di nan salario, a wordo priminti durante di eleccion, cu e 12.6% aki lo wordo debolbi cerca nan pero awor ta scucha cu esaki lo no ta e caso y cu e decision aki ta ‘tot nadere orde’ un biaha mas y cu no tin ningun expectativa cu lo haya e placa aki bek.

“Aki tambe ta trata di tur esunnan cu a biba riba un Fase, cual durante di eleccion a wordo bisa cu Fase lo den un forma permanente, ya cu Fase lo wordo sigui pa un programa nobo cu ta TIO, cu lo garantisa esunnan cu no tin trabou un entrada, awor ta resulta cu Fase ta termina yc u TIO no ta bin na vigor.
Pues eynan tambe un pueblo cu a biba den speransa, esunnan di mas necesidad den nos comunidad, ta haya un sla sumamente duro c’un engaño cu a wordo presenta durante di eleccion.

Mescos ta trata tambe di e engaño cu ta trata e cortamento den AZV, caminda tur hende por corda durante di eleccion, a bin cu medidanan caminda tin cu paga pa cierto remedinan y ora cu comunidad a protesta, gobierno a hala e medida aki aden y a crea e expectativa como si fuera e medida aki ta wordo hala aden definitivamente.
Sinembargo durante di un reunion di Parlamento recien, Minister a informa di un cantidad di medida mas cu ta bay bin den AZV, entre otro un ‘eigenbijdrage’ ora cu hende bay dokter lo tin cu paga, ora di bay Eerste Hulp lo tin cu paga, lo tin cu bay paga u n ‘risicoverzekering’ y lo tin cu paga cada bes c’un ciudadano mester di cierto remedinan ora cu e busca esakinan.
Tin remedinan cu no ta riba e lista positibo, ciudadanonan lo tin cu paga pa e remedinan aki tambe.
Pues un comunidad cu a wordo priminti cu lo no bin mas medida, un comunidad cu a wordo priminti cu locual tabatin na medida lo wordo debolbe na nan, awor ta haya e realidad cu tur esaki tabata un engaño.
Esaki ta di dos eleccion c’un partido ta drenta gobierno a base di engaño ya cui na aña 2017, a gaña nos ciudadanonan cu lo bay baha edad di pensioen, cu ta bay baha prijs di gasolin, cu ta bay baha prijs di comestibles na Aruba, cu lo baha prijs di invoerrechten, cu ta bay reduci tur e costonan cu ta pisa riba nos ciudadanonany awe e costonan aki ta mas halto cu nunca.
Pues un comunidad cu dos bes a wordo engaña pa un partido y pa tal motibo nos ta sinti cu pueblo Arubiano na e momentonan aki, a bibando c’un desilusion, un desapunto grandi di por a wordo engaña di e forma aki y ta bibando den un probresa sumamente grandi.”