“Un biaha mas a keda demostra cu Minister Ppresidente di Aruba, Evelyn Wever Croes, no a pone ningun ser humano central den maneho di su gobierno, cu excepcion di ;friends and family.’
Costo di salud ta subi mundialmente y na Aruba esaki no ta excepcion y ta logico cumester hiba un maneho dirigi riba maneha gasto medico eficientemente pero tambe riba mantene y aumenta calidad di cuido di nos hendenan.
Sinembargo e Minister Presidente di Aruba a lubida cu ta trata aki di bienestar  y bida di nos hendenan, di nos pueblo y e personalmente a  usa un raport cu recomendacion pa corta  gasto di salud y tira esaki  den scochi di Raymond Knops na Hulanda pa nan manda bek c’un stempel di ‘uitvoeren’ y pone henter e pueblo y mundo di cuido den problema serio.
Despues e mesun Minister Presidente aki kier pretende cu ta Knops ta force pa abusa di nos pueblo y loke ta mas tristo ta e hecho cu tin varios hende awe ta kere e señora aki.
Hopi ta esunnan cu sa masha bon cu e ta gaña nos pueblo  pero nan tin un interes personal pa defend’e  y  ta lubida cu e probecho  personal cu nan tin awor,  lo caba pero nan necesidad pa haña  cuido riba nivel, si lo keda existi tanten cu nan ta biba aki.
Ta ora pa habri wowo y stop acepta  un 6 pa un 9 di e gobierno actual y un Minister presidente  mentiroso, un minister presidente cu no a ria pa gaña den porta di misa, pa gaña pueblo cu e lo no tuma medida pero a bira tuma mas medida cu ningun otro gobierno den historia.
Aki nos ta papia di un Minister Presidente cu tin lunanan largo ta bailando gobierno Hulandes y CAFT, hungando rol di victima, inventando cantidad di excusas te ora cu por fin CAFT a bin mira loke pueblo a cuminsa mira tambe den su persona, esta un persona cu no ta di confia, un politico cu no ta lucha pa pueblo peo solamente pa un grupo previlegia di famia y amigonan.
Loke Prome Minister y Minister di Salubridad a presenta diamars den Parlamento, ta mescos un tipo di mapa pa pueblo caminda riba nan ruta pa haya cuido medico pa logra recupera nan salud, awor a bira un caminda cortico directo pa graf, directo pa santana.”