Durante tratamento di e ley relaciona cu uso di tabaco den luganan publico, lider di fraccion di AVP, Mike Eman, a haci uso di e oportunidad pa haci un apelacion riba Minister di Salubridad, Dangui Oduber, pa su intervencion den caso di dos cirujano local, kendenan no ta funciuonando manera mester ta e caso.
Señor Eman a mustra riba e impacto grandi cu humamento tin riba pulmon di tanto esun cu ta huma y esunnan afecta pa su humamente pero cu awor tin un situacion tambe hopi serio cu ta e efecto cu covid-19 ta ataca pulmon di unm persona.
“Humamento ta hopi relata na e problemam di pulmon, e tema di longkanker y nos sa cu na e momentonanaki tin un loke nan ta yama ‘post covid syndroom’ caminda hopi persona cu a haya covid, ta sigui lucha cu problemanan di pulmon.
Funcionamento di nan pulmon no ta 100 porciento, algun ta 50 porciento y otronan 40 porciento, pues un situacion sumamente complica cu a añadi na e problema di pulmon cu ta bin for di humamento, awor cu covid cu ta relata directamente na pulmon.
Ora nos kere cu nos a keda cla cu e reto di pulmon ta resulta cu no ta asina, tin un post covid syndroom caminda entre otro tin problema cu halamento di rosea y relaciona cu esaki mi kier a puntra Minister con e situacion ta na e momentonan aki.
Nos sa cun ‘longspecialist’ a bay Bonaire, con ta para cu e capacidad di longartsen actualmente pa atende cu tur e problemanan cu nos tabatin caba cu entre otro humamento y awor cu esunnan cu tin un situacion complica cu e post covid syndroom.
Papiando den mesun cuadro di capacidad di hospital y ciruhanonan, por a tende cu dos cirujano local, sta Tromp y Peterson, cu pa un of otro motibo a haya nan mes den un situacion cunan no ta funcionando na hospital.
Un di nan ta funcionando parcialmente na Imsan y e otro cu ta dr Peterson, no ta funcionando mes kende ta conoci den comunidad como un di e ciruhanonan grandi di Aruba, kende a sirbi su pais den un forma ehemplar, cu ta forma parti di e capacidad grandi di ciruhanonan cu nos tin den nos pais pero den e momentonan aki debi na un situacion cu a surgi, a dicidi cu e no kier funciona mas.”
Mike Eman a puntra Minister di Salubridad si su persona no ta mira si e lo por tin un rol como Minister pa interveni den e situacion aki, ya cu tin ora tur porta ta cera di comunicacion, AZV, hospital, Directie Volksgezondheid.
“Sinembargo tin bes un Minister den e rol di intermediador lo por duna atencion na e asunto aki ora cu partidonan no por bin hunto ya cu tin ora e partidonan ta hopi gefocused riba detaye, riba un punto di un contract of un diferencia di opinion.
Na mes momento tin biaha tin hopi ‘oud zeer’ entre institutonan y dokternan, entre e dokternan mes, e ora ta keda un gobierno of un minister cu por interveni pa trece tur hende bek na mesa pa Aruba no sigui perde dokternan.
Nos a tende di dokternan di cas cu ta bayendo, nos a tende di cierto specialistanan y awor nos ta tende di e conflicto aki di dos ciruhano cu no ta cumbini Aruba en general pero bou di e situacion actual, cu tin un presion asina grandi riba cuido medico, no ta e momento adecuado pa nos bay perde capacidad den nos cuido medico.
A base di experencia personal den capacidad di dokter Peterson den caso di mi esposa, un dokter sumamente profesional mescos cu dokter Tromp, mi ta kere cu Aruba no tin mag di perde e tipo di capacidad aki den e sector medico.”
Lider di frccion di AVP Mike Eman a haci un apelacion riba Minister Dangui Oduber, si acaso ainda no ta enterveni, pa haci esaki pa bienestar di henter comunidad.
