Den e “household survey” cu Banco Central a haci y a publica e resultadonan na Juli 2021 a resalta cu nos hogarnan a experiencia un perdida severo di poder di compra. E gastonan fiho – cu ta suma 61% di e presupuesto di nos hogarnan, a subi considerablemente. Den esaki, segun e investigacion di Banco Central, e gasto fiho di mas grandi di nos hogarnan, esta e pago di huur, a conoce un aumento grandi tambe. Den un situacion di perdida di entrada y poder di compra e hecho cu e gasto di huur ta uno fiho (non-discretionary) riba cual e huurdo no tin hopi influencia, ta haci e situacion aun mas difícil pa nos ciudadanonan cu ta biba den un cas of apartamento di huur. E hecho cu material di construccion a subi drasticamente ultimo tempo ta nifica cu esaki lo sigui tin un influencia negativo riba e prijs di huur di cas y apartamento.
Relaciona cu problematica aki miembronan di Parlamento, líder di fracción di AVP mr. M.G. (Mike) Eman y colega paralamentario mr. G. L. (Gerlien) Croes a haci un serie di pregunta na gobierno den preparacion di un ley di iniciativa cu nan ta preparando pa introduci un “huurtoeslagenregeling” (un subsidio pa huur) na Aruba.
PREGUNTANAN HACI NA GOBIERNO
E parlamentarionan a dirigi nan preguntanan na Minister di Asuntonan General, mr. Evelyne Wever Croes. Nan ta cuminsa na puntra si e Minister por duna Parlamento di conoce kico ta e pensamento di gobierno pa cu e situacion alarmante di e aumento grandi di gastonan fiho cu ta pisa hopi riba e presupuesto di famia y ta haci’e mas dificil pa nan por tin un dak riba nan cabes.
Tambe nan ta mustra e Minister riba e hecho cu segun CENSO 2020, 22.3% di famianan na Aruba ta biba den un cas of apartamento di huur. Nan ta puntra si e Minister por informa Parlamento cuanto mil famia di Aruba ta bibando actualmente den un cas of apartamento di huur cu ta di FCCA y cuanto den un cas of apartamento di huur priva.
Eman y Croes ta mustra cu den e survey di Banco Central a constata cu gastonan di huur ta subiendo pa motibo di e aumento di prijs di “real-estate”. Nan ta puntra si gobierno tambe ta mira un co-relacion entre e aumento grandi den prijs pa materialnan di construccion y e aumento di prijs di huur di cas y apartamento. E parlamentarionan ta especialmente preocupa cu den e encuesta di Banco Central famianan a duna di conoce di tin un preocupacion financiero hopi grandi. 36% a contesta cu nan ta sinti cu nan tin demasiado debe, 47% a contesta cu nan tin un preocupacion grandi pa cu nan finanzas. Eman y Croes ta puntra e Minister si Gobierno tin un bista di cuanto di e debenanan acumula cu nos comunidad ta preocupa pe tin di haber cu pagonan di huur pa cas y apartamento atrasa.
Otro indicacion di un desaroyo preocupante ta locual Eman y Croes ta mira for di cifranan di Centraal Bureau Statistieken den nan “4th Quarter Demographic Report”. Aki ta keda constata cu desde 2017 tin un aumento considerabel di personan cu nacionalidad Hulandes cu ta sali for di registro civil di Aruba (de-registration). Na 2020 esaki a yega te na 3113 persona. Esaki ta un cifra halto pa un comunidad chikito manera Aruba. Nan ta puntra Minister Evelyne Wever Croes si e por informa si gobierno a haci un investigacion di e causa di esaki. Tambe kico ta e rol di costo di bida, falta di empleo, falta di oportunidad y perspectiva den esaki? Nan ta puntra con gobierno ta mira e influencia di e aumento continuo di costo di vivienda den esaki ?
SIGURA TUR FAMIA UN BON CAS Y CU TA PAGABEL
Lider fraccion di AVP mr. Mike Eman y parlamentario mr. Gerlien Croes ta referi tambe den nan preguntanan preparatorio pa bin cu un ley pa crea un “huursubsidieregeling” pa Aruba, na e metanan pa alcanza un desaroyo sostenibel (SDGs) na cual Aruba tambe a compromete su mes. E SDG # 11 ta fiha como meta e desaroyo di ciudadnan y barionan sostenibel. Eman y Croes ta referi na target number 1 cu ta pone como prioridad pa alcanza e meta di SDG 11: “ensure access for all to adequate, safe and affordable housing and basic services and upgrade slums”. E parlamentarionan ta puntra con gobierno tin pensa pa cumpli cu e meta di haci casnan adecua, sigur y pagabel accesibel pa henter nos comunidad y con ta bay realisa ciudadnan y barionan sostenibel na Aruba?
E miembronan di Parlamento di fraccion di AVP Eman y Croes ta di opinion cu e situacion di costo vivienda ta causa di un crisis financiero y social grandi pa famianan na Aruba. Esaki ta wordo confirma dor di e cifranan di survey di Banco Central. Analisando e situacion aki e miembronan di Parlamento di AVP, ta di opinion cu mester introduci un areglo di “subsidio di huur”, manera cu tin pa casnan di FCCA, tambe pa huur di cas y apartamento priva pa esnan cu un entrada marginal. E meta di un “huursubsidie- of huurtoeslagregeling” lo ta pa garantisa cu famianan cu menos entrada por tin un bon cas y cu ta pagabel pa nan biba aden. Nan ta puntra si Gobierno ta comparti e opinion aki y si Gobierno ta habri pa introduccion di un sistema di “huurtoeslag”. E fraccion di AVP ta spera di por haya contesta rapido di gobierno pa asina nan finalisa e ley di iniciativa pa introduci un arreglo di subsidio di huur den espirito di e maneho di AVP caminda a introduci “reparatietoeslag” y “schoolkinderentoeslag”.
Fuente:
· Financial Wellbeing of Households; Findings of the 2021 household survey by the Central Bank of Aruba;
Financial Wellbeing of Households (cbaruba.org)
· CBS Quarterly Demographic Bulletin 4th Quarter 2021
Microsoft PowerPoint – QDB1220_2.pptx (cbs.aw)
· CBS CENSO 2020: Resultado Censo2020 – Vivienda – Noticia – Actualidad – Aruba Gobernacion (gobierno.aw)
· CBS Consumer Price Index/Bestaansminimum/Subsistance Level 2017 vs 2021
01-CPI-Press-Release-August-2021-English.pdf (cbs.aw)
Consumer-Price-Index-Press-Release-December-2017-English.pdf (cbs.aw)
