Un di e expertonan cu a worde consulta riba e iniciativa pa adapta e Landbesluit Bijstandsverlening pa cubri tambe un ajudo financiero na famianan cu un jiu bao di 16 anja cu limitación ta e conocido profesional, cu 29 anja di experencia riba e tereno di ajudo y guía pa personan cu limtacion, Sr. Tuyo Werleman.

Líder di fracción di AVP mr. Mike Eman hunto cu colega parlamentario drs. Mervin Wyatt Ras y asesora pa recién graduado den ley Wendrick Cicilia a reuni cu Sr. Tuyo Werleman pa haya su opinión y consehonan pa cu e iniciativa di Eman y Wyatt-Ras.

Manera ta conocí e ley existente ta duna e posibilidad solamente na hende riba e edad di 16 aña. E miembronan di e fraccion di AVP Eman y Wyatt-Ras a haya e esaki un falta den e Landsbesluit Bijstandverlening y a traha riba un “initiatief voorstel” pa trece cambio den esaki. Cu un articulo nobo, manera proponi como articulo 8 a, Eman y Wyatt-Ras kier corrigi e situación aki y pesey ta haci e proposicion pa cambio di ley. Di e forma aki famianan cu un of mas mucha bou di e edad di 16 aña cu un limitacion fisico of mental lo por bini na remarca pa ayudo via di Landsbesluit Bijstandverlening.

Sr. Tuyo Werleman a concorda cu Eman y Wyatt Ras cu tin hopi gasto pa un famia cu un jiu cu limitación y sigur e cambio aki ta na su lugar. E ta contento cu e iniciativa aki, pasobra pa hopi famia cu jiunan cu limitación un ajudo financiero manera proponi dor di Eman y Wyatt-Ras lo trece un alivio. E líder di AVP mr. Mike Eman y parlamentario drs. Mervin Wyatt-Ras tabata hopi gradicido pa cu e disponibilidad di Sr. Tuyo Werleman pa comparti cu nan su vasto experiencia y conocemento den maneho pa cu asistencia, guía y cuido pa personan cu limitación y nan famia. Líder di fracción Eman y parlamentaria Wyatt Ras hunto Cicilia a scucha varios otro experto y profesionalnan den e proceso pa yega na nan “initiatief voorstel”.